Guwahati, Naitung 09 :Ka jingdon jong ki briew ki ba shah ktah ha ka jingpang Japanese Encephalitis (JE) ka la kiew sted bha ha Assam, bad da ka jingiap jong uwei pat ka la kyntiew ia ka jingdon jong baroh ki ba iap na kane ka jingpang sha ka hynniew ngut tang hapoh kine ki phra sngi ba la dep.
Nalor kata ki la don sa 74 ngut kiwei pat ki ba la shah ktah ha kane ka jingpang JE ia ka ba la lapdien ha kane ka jylla naduh ka 1tarik mynta u bnai, kata ka ba kynthup ia ki 25 ngut ia ki ba la lapdien dang ha kane ka sngi Thohdieng ba la lah, ong u heh ka tnat National Health Mission (NHM).
Na ka liang katei ka tnat ka koit ka khiah ka la pynmih ia ki hynniew tylli ki jingbthah sha baroh ki district khnang ban lapdien bad ban tehlakam ha ka ba iadei bad ka jingdon jong ki briew ki ba shah ktah ha kane ka jingpang. Nalor kata la buh ruh ia ka state control room ha ryngkat u phone bombor 104 bym donkam siew bad la bthah ruh ia baroh ki district ba kin buh ia kum kine ki juh ki lad jingiarap.
Ha kajuh ka por yn pynlong ruh ia ki jingialang jong ki kynhun task force ba kyrpang ha baroh ki district bad ia ka jingmih na kine ki jingialang yn sa phah sha ka head office ka NHM ha ka jylla ha Guwahati, ong katei ka tnat.
Ha kane ka snem ba la dep ki la don haduh kumba 40 ngut ki briew ki ba la khlad noh na kane ka jingpang JE ha kane ka jylla, ong ka khubor heh sorkar. Ka NHM ka la bthah ruh ia ki tnat ka koit ka khiah ha baroh ki district ba kin bishar bniah bad ban ai jingtip mar mar sha ki bor ka koit ka khiah ha ba don kino kino ki jingshitom ki ba iasyriem bad ka khieshohrih khnang ba kin lah ban leh ia ka ba donkam.
Na ka liang ka tnat ka koit ka khiah ka la shim ia baroh ki lad jingiada bad ki don ruh ki jingleh ia ki tes ki ba ym donkam jinglut hapoh ki hospital jong ki district bad ki medical college jong ka sorkar jylla.
