Guwahati, Naitung 09 : Ka Lok Sabha MP ka Trinamool Congress, ka Mahua Moitra ka ba la ngat ha ki kynrum kynram halor ka jingpynpaw ka jong ka ha ka ba iadei bad ka Blei Kali ka la buh jingkylli la u Myntri Rangbah (CM) ka Assam u Himanta Biswa Sarma u lah ne em ban ai jubab da ka jingthoh halor kiei ki jait jingtyrwa na ka bynta ka dur Blei hapoh Kamakhya temple.
“Hato ki CM jong kiwei pat ki jylla ba synshar da ka BJP ki leh kumjuh ha ka ba iadei bad ki jingtyrwa na ka bynta ka Blei Maa Kali ha ki temple ki jong ki? Hato ka kyiad kam dei ka bynta jong ki jingtyrwa ha kine ki temple? Ka BJP ka la pyrshang borbah ban banbor ia nga namar nga la pynpaw pyrshah ia ki jingleh bymman jong ki, hynrei nga tip ba kine ki jingpyrshang jong ki kin ym treikam,” ong kane ka nongialam ka Trinamool ha ba kren lyngba ka Bengali news channel.
Ka Moitra ka la ngat ha ki kynrum kynram namar ka jingkren hapoh ka jingialang da ka ba ong ba ka don ia ka hok kum ka riew shimet ban pyrkhat ba ka Blei Kali ka dei ka ba bam doh bad ka ba dih kyiad, kata kumba uwei pat kawei ka briew ki don ia la ka jong ka rukom mane Blei.
Lah ban kdew ba na ka liang ka Seng Bharatiya Janata Party (BJP) ka la dawa ba dei ban kem mardor ia kane ka MP ka Trinamool Congress, ka Mahua Moitra hadien ki jingkynthoh ki jong ka pyrshah ia ka Blei Kali.
Na ka liang kane ka party ka la byrthen ruh ban leit sha ka iingbishar lada ym shim ia kino kino ki sienjam pyrshah ia ka hapoh ka shiphew sngi.
“Ia ka Blei Kali ym shym la mane kum ka blei ka ba dih kyiad bad ka ba bam doh katkum ki kyndon ka jinglehniam jong ki Hindu ne ka Sanatan Hindu dharma. Ki jingkren ki jong ka ki la ktah jur ia ka jingsngew niam. Ngi dawa ban kem ia ka mardor namar kane ka jingkynthoh ia ka Blei Kali,” ong u president ka BJP u Sukanta Majumdar.
