Shillong, Jylliew 14 : Arngut ki samla kila iap bad arngut kila mynsaw jur ha ka jingkylla ka kali kaba ki shong hapoh ka surok National Highway-06 na Shillong sha Guwahati hynne ka step phyrngap jong ka sngi Thohdieng.
Kat kum ka khubor Pulit, kane ka jingjia kala jia ha ka por 1 baje eiei ha Nongpoh Proper hajan ka Civil Hosital, Nongpoh. Ia kine ki arngut kiba iap la tip kyrteng u Banrap Marboh ba na Mawlynrei, Shillong bad u Frick Kharkongor ba na Nongrah Shillong.
La iathuh ba arngut ki paralok kiba iadonlang hapoh ka kali kila mynsaw jur bad don mynta hapoh ka jingsumar ha Civil Hospital Nongpoh. Kine ki arngut ki dei u Leuwis Kharkongor ba na Lapang bad u George Kharkongor ba na Nongrah.
Ki Pulit ki iathuh ba kine ki sawngut kila mih na Shillong da ka kali Local Taxi ML05-N-0174, kaba la niah da u George Nongrah hynrei namar ka jingpynher sted ia ka kali, une u nongniah ula rat ia ka jingker pdeng (divider) jong ka surok bad pynlong ia ka kali ba kan kylla baji hapdeng ka surok.
Haba ioh jingtip ia kane ka jingjia, ki Pulit kila hiar wut wut sha kane ka jaka bad kila pynkit noh ia baroh sha Civil Hospital Nongpoh ban ioh ai jingsumar hynrei ki Doktor kila pynbna ba u Banrap Marboh uba la mynsaw jur eh, ula khlad noh hashuwa ban poi ha hospital.
La iathuh ba u Frick Kharkongor ruh ula mynsaw jur bha na kane ka aksiden bad la pynkynriah noh wut wut ia u sha Civil Hospital Shillong ban ioh ia ka jingsumar ba paka hynrei une u briew ruh ula khlad noh hadien katto katne kynta.
Ki Pulit kila patan noh ia ka kali sha thanad bad ka jingtohkit mynta kala iaid shakhmat.
