Tura, Nailar 25 : Ha ka jingjia ba sngewsih, arngut ki briew kila iap hashen bad 4 ngut kila mynsaw jur haba ka kali ba ki iashong kala ngat ha ka jingaksiden hajan Rongjeng, East Garo Hills.
Ka daw jong kane ka jingaksiden la ong ba ka dei n aka jingbym treikam shuh ka brake jong ka kali.
Kine ki briew ba iap bad ba mynsaw kila mih na Mangsang da ka Tata Sumo ML06-4196 ban leit ki thain Rongjeng hynrei namar ka jingthut ka brake jong ka kali, kane ka kali kala aksiden noh hajan Dambo Bima. Ia kine kiba iap bad ba mynsaw la pynkit noh sha Rongjeng CHC.
Uwei na kine kiba iap u kyrteng u Wansolang Rynniaw ba 28 snem uba dei na Nongjri, West Khasi Hills bad uwei pat u dei u Suchindro R Sangma ba 71 snem uba dei na Umden, Ri-Bhoi. Ia ka met jong ki la buh ha ka jaka buh metiap ha Williamnagar Civil hospital ban leh post mortem.
Kiba mynsaw pat ki kyrteng u Victor Diengngan (45 snem), uba dei u nongniah ka kali bad uba sah ha Nongkri, u Helson Sangma ba 70 snem na Mawjir, u Phrangben Myrthong ba 33 snem na Ri-bhoi Mymphong bad u Nomingstone Rynmaw.
Ki pulit ki iathuh ba u nongniah u khlem lah tehlakam shuh ia ka kali namar ka jingbym treikam ka brake bad ha ka jingia leh ban lait n aka jinghap sha riat, u nongniah ula leit ban tynrah ia ka kynroh kaba don sha ka liang ka mon jong ka surok.
Pule lang ia kane: Jan khie ka thma iapher Jaidbynriew hapdeng ki paid Khasi-Pnar bad Karbi ha West Jaintia Hills
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
