Nongpoh, Risaw 23: Palat 50 ngut ki doktor ba pawnam ka Thain Shatei Lam Mihngi kila poi iathir jingmut hynne ka sngi ban tei ia ka PA Sangma International Medical College & Hospital hapoh ka jaka jong ka University of Science & Technology Meghalaya (USTM).
Lah ban kdew ba ia ka PA Sangma International Medical College bad Hospital la dep ban buh mawnongrim ban tei ha ka 3 tarik u Risaw da u Myntri Rangbah ka jylla Conrad K Sangma ha ka jingiadonlang ka Rhonda Vetere, Global Leader na USA, u Lat ka jylla Meghalaya barim u R.S. Mooshahary, u Bah Lakmen Rymbui, Myntri ka tnad pule puthi ka jylla, u Dr R. C. Deka, Director barim ka AIIMS lem bad kiwei kiwei.
Na ka liang u Chancellor ka USTM u ba dei ruh u wei na kiba la don bynta ban seng ia kane ka jaka pule doctor ha ryngkat ka hospital ba la ainam ha ka kyrteng u PA Sangma Myntri Rangbah barim ka jylla Meghalaya , u Mahbubul Hoque u la pynpaw ba u angnud ba lyngba kane ka jaka pule doctor bad jaka ai jingsumar kan long shisha ka jingmyntoi kaba khraw na ka bynta ki paidbah ka thain Lam Mihngi khamtam ia ka jylla Meghalaya hi baroh kawei.
Mynta ka sngi la ioh ban pynlong ia ka jingiamir jingmut kaba kongsan eh kumno ban pynbit pynbiang ia kane ka projek kaba khraw na ka bynta ka jingpule doctor bad ruh ka jaka sumar ia ki paidbah ba pang ba shitom ha kaba la ioh ban iatai halor ki lad ki lynti kumno ban pyndep kloi ia ki jingtei baroh bad ruh ban pynbit pynbiang ia ki jingdonkam kiba katkum ka juk kaba mynta.
Kaba kham kongsan ka jingiatai ka long kumno ban pynbit ia ka jingsumar ia ki nongpang, ka rukom ai jinghikai kaba tbit bad ki jingwad bniah kiba paka (Patient care, Teaching and Research).
U Chancellor ka USTM u la pynpaw ruh ba ai kane ka jingtei la buh thong ban pyndep hapoh u bnai July 2024 bad naduh u bnai October 2024 la thmu ruh ban sdang ia ki kam kiba ia dei bad ka hospital.
Ka jingai jinghikai na ka bynta ki samla pule doctor lane MBBS jong ka wat kaba nyngkong yn sdang naduh u bnai nailar 2025.
