Ha kajuh ka thliew la tep don burom ia ki 2 ngut ki shipara ba iap shah ban khyndew
Nongstoin, Jylliew 19 : Ka mynsiem ba lung bad ba pangnud kala rung ha baroh ki briew kiba leit sha ka jingleit ontep don burom ia ki arngut ki shipara kiba dei ki dkhot ka Kids TARARI Choir, Nongstoin, kiba la khlad na ka jingtwa khyndew ha ka step sngi Saitjain ha Pyndengrei, Nongstoin.
Wat hapdeng ka jingpynthud u lapbah lapsan, ki paidbah ki la tuid ban leit sngewlem ha ka sngi leh burom khaduh ïa kine ki shipara, kata I Maïanylla Nongsiej bad I Cafinia Nongsiej, kaba long hynne ka sngi ha shnong Mawlangniang.
Ka ïing ryngkat ka balang ka la ïoh ban pyndep ïa ka jinglehniam ba khaduh ia kine ki heprit kiba la khlad jyndat noh tang shiteng por nangne na sla pyrthei. Shuwa ka jinglehniam la ioh ia ki jingkren na ki para klas I Maïanylla, i Caffinia kiba na ka skul St Peters Pyndengrei, ki dkhot ka jingïaseng khynnah Balang Presbyterian Mawlangniang, ki dkhot ka Jingïaseng samla Balang Presbyterian Mawlangniang, na ka nonghikai ka Kids Tarari Choir Nongstoin bad na ka ïing ka sem kiba la pule ruh ia ka history kaba lyngkot halor ka jingim kine ki shipara.
Ha katei ka sngi shuwa ban leit ontep donburom ïa kitei ki heprit, ki dkhot ka Kid’s Tarari Choir Nongstoiñ kila kynud bad rwai ïa ki sur ba sngew myllung “Mynsiem ba dang lung” bad ruh ia kawei ka jingrwai bala thaw kyrpang ia kane ka jingduh noh ia kine ki Dkhot bala ai kyrteng ka “Jlang Ki Her”
Hadien ba la ioh ban pyndep ia ka jingleh niam, la rah ia ki metiap jong kitei ki heprit ban tep donburomlang ha kajuh hi ka thliew ha lum jingtep jong ka Balang Presbyterian Mawlangniang kawei na ki shnong kaba don ha ka thain Urkali nongstoin.
Kane ka dei ka jingrwai bala thaw kyrpang da ka Kids TARARI halor ka jingkhlad noh kine ki herit
Jlang Ki Her
1.Shisien mynwei kala jia ki khun tipsngi imei
Ki khun tipbriew ki khun tipBlei lyngkthop ki thiah ha dpei
Ha jingbympoi pyrkhat tang shi khyllip ka khmat ki iehnoh
Ki hynmen para imei ipa ki lok ki jor baroh
Chorus
Jlang ki her sha lyndet lyoh
Iangi phi ieh ha jinglyngoh ka ing ka sem baroh
Ka kynjah ka tmang ryngkat ki ummat kthang
Ha ing ipa phi shong hangta
Ymdon shuh shitom ne pang
2. U kpa ha jingialeh laki khun um kwah ban duh noh
Jingdum ka tap ki khun ki ap ko pa iangi iarap
Ki para kiba iam ki hynmen ruh hangtai ki pyrta
Ko khun to ap iaphi ngan rap wat tieng ianga to ap
3. Iaphi nga ju sneng ju mai ka buhnud ha phi kam ju sap
Iaki para phi peit phi jngoh ka buhteng phim ju ap
Laka sap phim ju tyngkai phi iai kynud la sur jingrwai
Syndah u Trai mynta phin rwai ym don shuh jingkhuslai
4.Ki ummat kiba jaw ban pynphai pat iaki ngin ym lah
Ki sur kynud kiba phi rwa”nongrim ka la jah rngai”
Ka rkhie ka rwai bad ka kmen bad phi hangne ngin ym lah ioh shuh
Ha kti kamon bad la u Trai jingkthang baroh kin duh
Pule ruh: Thmu ka Tnad Animal Husbandry ban phah test formalin iaki dohkha ha Pastuer Institute
