Shillong, Jylliew 25: Ka Dorbar Shnong Lummawbah ha ka sngi Saitjaiñ ka la pynlong ia ka jingpynshai paidbah shaphang ka jingsniew jong u drok kum shim bynta ka jingrakhe ia ka International Day Against Drug Abuse & Illicit Trafficking, kaba la pynlong ha Shonroy Basan Secondary School, Lummawbah, Shillong.
Na ka liang u MLA ka thaiñ Bah Hamlet Dohling haba kren kum u Kongsan u la pynpaw ia ka jingbynniaw halor ka jingnang bun ki samla kiba kyrni ha u drok bad kiwei kiwei ki jingdih kiba sniew. U ong ruh ba namar ki samla ki dei ka lawei jong ka Jylla bad ka Ri, kumta donkam ka sienjam kaba kyrpang na ka bynta jong ki khnang ba kin ym ngop ha ki tyrsim jong kitei ki jingpynshoi jong u drok.
“Nga ieng beit ha ka nongrim ba ki kam pynroi ki wan ha ki ar rukom, kata ha ki kam pynroi kiba dei na ka imlang sahlang bad kawei pat na ka bynta shimet shimet, watla kaba nyngkong kadei kaba kongsan hynrei ka long ruh kaba donkam pat ban peit ba ka imlang sahlang bad ki nongshong shnong ruh ki dei ban long kiba kordor,” u la ong.
Da kaba kam ruh ba ka jingshyrkhei u drok kadei kaba la ktah ha satlak ka pyrthei pynban u ong ba ka jingsdang na kawei ka shnong ne ka dong kan dei shi bynta jong ka sienjam jong ka jingiakhun pyrshah. U kyntu ruh ia ki paidbah ba kidei ban pynshai kylliang ha ki paralok parajor ia katei ka khun ban iakhun ia ka jingshyrkhei jong u drok.
Shuh shuh u ong ruh ba kane kadei ka por ba baroh ki dei ban snohkti lang namar tang ka sorkar ne tang ki pulit kim lah shuh ban leh ei ei.
Kumta, na ka liang u MLA u khot u wer ia baroh ba kin mih shakhmat na ka bynta ban ai ka jingiatreilang khnang ba yn lah ban iada bad iarap kham bun ki mynsiem briew ba kin lait na ki tyrsim jong u drok.
Ha kane ka sngi la ioh ruh ia ka jingpynshai kaba kham bniah na ki nongkren kiba khot kyrpang kynthup naduh u Bah W Nongneng, Officer in Charge, Jhalupara Outpost bad B W Sohkhlet, Assistant Professor (Sociology Department), Umshyrpi College, Shillong.
Kiwei pat kiba kren ki kynthup ia i Dr. Badaplin War, Bah E Thangkhiew Rangbah Shnong Lummawbah nalor ki nongialam shnong bad ki seng bapher bapher.
