Nongpoh, Risaw 11 : Ka Ophis ka District Tuberculosis Officer (DTO) kala pynlong ia ka jingialap ha Ri-Bhoi District, ban pynsngewthuh ia ki paidbah halor ka thong jong ka Pradhan Mantri TB Mukt Bharat Abhiyan (PMTBMBA) ban rat diengkhong ïaka jingpang Tuberculosis (TB) hapoh ka District bad ka ri India baroh kawei.
Ia kane ka jingialap la pynlong hynne ka sngi ba-ar ha Conference Hall jong ka Ophis u Deputy Commissioner ka Ri-Bhoi District kum shibynta ban pynshai halor ka thong jong ka Sorkar Pdeng lyngba ka MPTBMBA.
Ka PMTBMBA ka dei ka thong jong ka sorkar kmie ban ïarap ïa kiba pang TB bad khamtam ba ki nongshong shnong ka Ri India kin don bynta lang naduh ki nongmihkhmat, ki ophisar, ki nongbei pisa ban iarap sha kito kiba ioh ïa katei ka jingpang, ïa kaba la plie paidbah da ka President jong ka Ri India ka Drupadi Murmu haka 9 tarik Nailar 2022.
La sakhi ruh ha katei ka sngi da ka jingdonlang u Bah Sosthenes Sohtun MLA ka Jirang, Bah R Kharbihkhiew ADC, u Dr. M Mawrie State Tuberculosis Officer, ka Dr. E Kalwing District Tuberculosis Officer, ka Dr.MN Marak M&HO Governor House bad kiwei kiwei ki ophisar naka tnad ka koit ka khiah.
Ha katei ka sngi naka liang u Bah Sothenes Sohtun MLA ka Jirang u la pynbna ruh ba un ai jingïarap kumba 10 hajar ka pisa man u bnai kumba 3 snem lynter naka bynta 10 ngut ki nongpang TB ha Jirang Constiteuncy kum ka jingtynrong lem bad ai mynsiem ïa kiwei ban mih shakhmat naka bynta ki jingïarap ïa kiba pang TB.
