Shillong Nailar 29: U Nongniah Saikil ne Cyclist u Rojit Singh Yanglem mynta ka sngi, ula iakren bad ki samla jong ka nongbah Shillong halor ki jingmyntoi lyngba ka jingbam ia ki jingbam tei met bad ban im iaka jingim kaba bha ban long kiba koit ba khiah.
U Rojit u la iakren bad ki samla, ha ka prokram “Meet the Champion” kaba la pynlong da ka Ministry of Youth Affairs, kum shi bynta ban rakhe iaka National Sports Day haka jylla Meghalaya ia kaba la wan ban iashimbynta palat 200 ngut ki khynnah pule ha St. Anthony’s Higher Secondary School.
Une u nongniah saikil ba pawnam ka ri, ula ai jingbatai halor ka jingkongsan jong ki kam ialehkai bad ka rukom im kaba koit ba khiah ha ka jingim jong ki khynnah pule bad ula iathuh shaphang ka rukom pyntbit ialade bad kumno lyngba ka jingtrei shitom bad jingaiti met bad mynsiem u la kiew shapharang ha ka kam ialehkai.
Ki khynnah pule jong ka St. Anthony’s kila kylli jingkylli halor ki kam ialehkai, ka koit ka khiah bad ka bam kaba tei bad kiwei kiwei, ha kaba ki la ioh ka jubab kaba hun na une u nongniah saikil ba tbit.
U Principal jongka St. Anthony’s Higher Secondary School u Rev Fr Anthony Kharkongor ula pynpaw ka jingsngewnguh ia ka Sorkar Meghalaya bad Sorkar India halor ka jingjied iaka skul jongki ban pynlong ia ka prokram ‘Meet the Champion’.
U la iaroh ia ka sienjam jong ka Sorkar bad ong ba kine ki jingiamir jingmut kin wanrah ka jingkylla kaba bha ha ki khynnah skul bad kan ai mynsiem ruh iaki ban bud ia ki lynti jong kine ki nongialehkai ba tbit, ki lahduh kiba wanrah nam bad burom ia ka ri.
Kum shi bynta jongka ‘Meet the Champion, u Yanglem ula ialehkai Basketball ruh bad ki khynnah pule.
U la iaroh ia u Myntri Rangbahduh jong ka ri, u Narendra Modi namar ka jingshim ia kane ka sienjam ban rakhe ia kane ka sngi kaba kongsan bad ula ong, ba yn pyrshang tyngeh ban ialehkai bha bad u don iaka jingthrang ban mihkhmat iaka ri India ha ka Olympic kaban long ha u snem 2024.
Kum ban shu pynkynmaw, ia kane ka prokram “Meet The Cahampion” la plie ha u bnai Nohprah 2021 da u khlur ialehkai ka ri u Neeraj Chopra, uba la ioh iaka takma ksiar ha ka Olympic bad kane ka prokram mynta kala poi sha kylleng ki bynta jong ka ri ha kine ki khyndiat bnai bad bun ki nongialehkai ba pawkhmat jong ka ri kila leit iakynduh ia ki khynnah skul ha ki 26 tylli ki jaka ha kylleng ka ri kum shi bynta jong ka jingrakhe ia ka National Sports Day.
