Nongpoh,Naitung 25: U MLA ka Congress na Mawhati Bah Charles Marngar, ha ka sngi Balang, ula lum ia ka jingialang bad ki Khlieh Nongsynshar Shnong ki 15 tylli ki shnong ka Mawrong Road Area bad 5 tylli ki Shnong ka thain Mawtari Thaiang, namar ka jingsniew palat jong ka surok.
Kane ka jinglum u MLA ia ki Khlieh Nongsynshar kala wan jia hadien ka jingiohi ia ka jingpynslem jong ka Sorkar Jylla ban pynmang pisa noh na ka bynta ban shna pynbha ia ka surok Mawrong.
Ia katei ka jingialang la pynlong hapoh ka Iingdorbar Hall jong ka Shnong Rtiang, Ri-Bhoi District.
Ha kane ka sngi, u MLA bad ki Khlieh Nongsynshar Shnong kila leit ruh ban jurip ia kane ka surok ha ki bynta kiba kham sniew kaba sdang naduh ba kut ka surok rong ka shnong Rtiang haduh ba kut ka shnong Nongsangu, kaba don ka jingjrong ba 25 km eiei.
U Rangbah Shnong ka Syngku Bah Klurban Shadap bad Rangbah Shnong ka Langsaw Bah Spalton Laloo, kila pyntip ba kane ka surok kala kot kumba 25 snem eiei naduh ba wan ban siang rong ia ka bad haduh mynta kam shym la don satia ka jingmaramot haduh ba bun ki bynta jong ka surok kila sniew.
Kila pynpaw ba ka Sorkar ka dei ban shna noh mardor ia kane ka surok lem kumta ki Khlieh Nongsynshar Shnong ha ryngkat ka jingiasngewthuh jingmut lang bad u MLA, kin sa shim ia kwei ki lad ki lynti kiban pynbor ia ka Sorkar.
U MLA/MDC Bah Charles u pyntip ba naduh ka 6 tarik Risaw 2023, ula leit ban iakynduh ia u Symbud Myntri Rangbah ba khmih ia ka tnad PWD (Roads) Bah Prestone Tynsong ryngkat ka dorkhas ba kyrpad ban pynmang skhim noh ia kane ka surok.
U pyntip ba u DyCM ula iathuh ba ia ka surok Mawrong la dep ban pynrung ha ka skhim PMGSY Phase-III bad la khmih lynti ba ka jingpyntrei ia ka surok kan sdang naduh u bnai tlang jong u snem bala dep.
“Haduh mynta ngim pat iohi wat tang iaka sanction order jong kane ka surok. Ngin sa leit iakynduh biang ia u DyCM ban pynkynmaw ia kane ka kam” ula ong.
Nalor kane ka surok, u Bah Charles u pyntip ba ka jingialang kala iakren ruh halor ka jingwanrah ia ka PHC ha ka thain bad pyntip ba kum u MLA, un sa ialam ia ki Khlieh Nongsynshar Shnong ban iakynduh ia ka Myntri ka Koit ka Khiah ka Jylla ha ki sngi ban sa wan.
