Shillong, Risaw 6: U MLA ka Mawhati bah Charles Marngar ryngkat bad ki nongialam shnong ka thain Mawhati, ki la leit iakynduh ia u Symbud Myntri Rangbah ka Jylla ba khmih ia ka Tnad PWD (Raods) bah Prestone Tynsong bad buh ia ka jingkyrpad ba un tuklar lem noh mar mar ha kaban maramot bad shna pynheh ia ka surok na Sonidan ter ter shaduh sha Umsiang, kaba jngai kumba 40 Km eiei.
Une u MLA bad ki Nongialam Shnong kila pyntip ba kane ka surok kala sniewbha bad kala buh ha ka jingeh bad jingjynjar ia ka leit ka wan jong ki paidbah ka thain.
Ha kajuh ka por, une u MLA ula pynpaw ia ka jingsngewnguh ia ka Sorkar Jylla kaba la shimkhia ban shna thymmai ia ka surok naduh Umsning sha Jagi Road, Assam, kaba la dep ban siang rong mynta mar shiteng.
Halor ka surok na Sonidan-Umsiang, u MLA u pyntip ba u Symbud Myntri rangbah ula kular ban sa bthah ia ki Ophisar ba kin pynkhreh noh shaid shaid ia ka mang tyngka ban ioh shna noh ia kane ka surok.
Haba phai sha ka surok na Umsning haduh Mawrong kaba la dep siang rong kumba 2km, u MLA u pyntip ba u Symbud Myntri Rangbah ula iathuh ba kane ka surok kala rung hapoh ka skhim PMGSY bad ka Tnad PWD kan sa pyntrei noh shaid shaid ia kane ka kam.
