Shillong, Risaw 06: U Myntri Sorkar bad Chairman ka Regional Committee ka West Khasi Hills Bah Paul Lyngdoh hynne ka sngi Thohdieng, ula ong ba ka jinghiar jurip lang ia ka Langpih Sector bad ka jingaiti ia ka kaiphod da ki Regional Committee ka Assam bad Meghalaya, yn pyndep noh hapoh une u bnai ba mynta.
Haba iakren bad ki nongthoh khubor, u Bah Paul ula iathuh ba u Myntri ka Sorkar Assam Chandra Mohan Patowary u dang leit jingleit mynta.
“Hadien ba u Patowary ula wan phai sha Guwahati, ngin sa lah ban pynbeit ia ka sngi (ban iahiar jurip lang ia ka Langpih Sector)” ula ong.
“Ngin pyrshang ruh ban pyndep ia ka kaiphod kaba ki ar Committee ki iasam jingtip, kaba mut kan dei kawei ka kaiphod bala pynkhreh lang da ki artylli ki Committee” ong u Bah Paul haba bynrap “ka jinghiar jurip bad jingaiti ia ka kaiphod kan long noh hapoh une u bnai Risaw”.
