Shillong, Naitung 11 : U Myntri Rangbah ka Jylla Conrad K Sangma ula iashimbynta ha ka jingialang iasyllok bad ki Rangbah Shnong ka Greater Shillong Planning Area halor ka jingwanrah ia ka khuid ka suba bad pynitynnad ia ki jaka sor hynne ka sngi Palei.
Kala don ruh ka jingpyni ia ki jingbatai (presentation) halor ka jingpynkhuid bad pynkhie im ia ka Wah Wahumkhrah bad ka rukom bret ia ki niut ki nier ha kane ka jingialang. Kala don ruh ka jingiasyllok halor ki sienjam ban shim da ka jingiadon bynta lang jong ki Shnong ki thaw.
U Myntri Rangbah ka Jylla hadien kane ula iakren iakhana bad ki Nongiashimbynta bad jubab ruh ia ki jingkylli halor ka jingpynitynnad, pynkylla bad ka jingwanrah ia ka khuid ka suba ha Nongbah Shillong nalor ka kam ki nongshongdukan madan, ki jaka shong dukan madan bad kiwei kiwei.
Kiba la iadonlang ha ka jingialang ki kynthup ia u Symbud Myntri Rangbah ka Jylla Bah Sniawbhalang Dhar, u Chief Secretary ka Jylla Bah DP Wahlang bad ki Heh Ophisar ka Tnad Urban Affairs.
