Shillong, Naitung 11 : Ki Pulit ka Ri-Bhoi District, kila ioh kem sa ia arngut ki Nongialam/dkhot ka kynhun Sleeper Cell jong ka seng Hynniewtrep National Liberation Council (HNLC) na Mawlai.
Kine ki arngut ki kyrteng u Sanbor Rapsang ba na Mawlai Umjajew bad u Kynsaijun Thabah ba na Umlyngka, Upper Shillong.
U Superintendent of Police ka Ri-Bhoi District Jagpal Singh Dhanao, u pyntip ba ia Sanbor Rapsang la ioh kem ha ka sngi Palei na Mawlai katba ia u Kynsaijun Thabah la kem naduh ka 5 tarik Naitung.
U pyntip ba ka jingiohkem ia kine ki arngut kala wan jia haba tohkit ia ka Umiam PS case No. 46(06) 2024 bala register hapoh ak kyndon 120 B/506/384/511 IPC ba pule lang bad ka kyndon 10/13/17/18 UA(P) Act.
Ki Pulit ka Ri-Bhoi ha u bnai Jylliew, kila iohkem ia 4 ngut ki dkhot ka Sleeper Cell ka HNLC na Ri-Bhoi bad ioh kurup ia bun bah u bomb IED bad ki tiar shna bomb, da ka jingthmu ban pynbthei bomb ha Shillong bad ha thain Nongpoh.
Kine ki 4 ngut ki kyrteng u Cyfrank Paul Pariat, Kitbok Mujai, Barnabas Lyngdoh bad u Wanpynshngain Dympep. Kine ki donkti ruh ha ka jingsam shithi dawa pisa bad byrngem byrsit ia kiba bun ki briew.
U Superintendent of Police u pyntip ba ka kyrteng u Kynsaijun Thabah kala mih ha ka jingtohkit ia u Cyfrant Paul Pariat, ula phla ba ula dep ban wan pyndep ia ka jinghikai ba shibnai ha Bangladesh bad u Kynsaijun hapdeng u bnai Naitung 2023 tad haduh u Nailar 2023.
U pyntip ba ki Pulit kila iohkem ia u Kynsainjun Thabah ha ka 5 tarik Naitung bad ha ka jingtohkit, ula phla ba u dei u dkhot ka HNLC bad ula leit sha ka jinghikai pyntbit bad u Cyfrank Pariat.
U Jagpal u pyntip ba ka kyrteng u Sanbor Rapsang pat kala mih ha ka jingtohkit ia u Kynsaijun Thabah ula phla ba dei u Sanbor Rapsang uba la iarap ban pynbiang lut nadong hadong ha ka jingleit jong u bad u Cyfrank sha Bangladesh ha u snem bala lah.
Ki Pulit kila pynlong ia ka jingtohkit kaba bniah bad ha ka sngi Palei kila leit ban kem ia u Sanbor na Mawlai,
Ka jingtohkit ia u Sanbor kala iaid shakhmat ban iohksai shuh shuh ia ki kam jong ka HNLC.
 na Mawlai.){kind=link}