Tura, Nailur 21 : Ki paid riewngeit ka rilum Garo ki la phah ka jingai khublei kitbok ia u Kpa Bakhuid Pope Francis ba dei u khlieh duh jong ka Balang Katholik, lyngba u Lyngdoh sad jong ka (Tura Auxiliary BIshop) u Bishop Jose Chirackal ha ka 17tarik mynta u bnai ha Vatican.
U Bishop Jose u la don artaiew ha Vatican ban shim byna ha ka prokram jong ki Bishop kaba la don naduh u snem 2019 bad ha kane ka jingleit u la kynduh kyrpang ia u Kpa Bakhuid ban ai ka jingkitbok na ka liang ka rilum Garo.
“Ha kane ka jingkynduh bad u Kpa Bakhuid, nga la kylli shaphang ka koit ka khiah jong u bad u la iathuh ba u shait u khlain. Nga la ai ruh ka jingkitbok na ki paidbah ka rilum Garo. Ka la dei shisha ka jingkynduh kaba kmen nalorba nga ioh lad ban kynduh ia baroh ki Bishop na ki ri ka pyrthei,” ong u Bishop ka Tura haba kren bad Ka Shlem.
Hadien kane, u BIshop Jose ryngkat kiwei ki la leit ruh sha Castle Goldolfo kaba dei ka jaka sah Lyiur jong u Kpa Bakhuid ban leit jngoh ia ki jaka sah, ka ophis bad kiwei kiwei jong u Kpa Bakhuid.
Ha kitei ki sngi, ki la don haduh kumba 200 ngut ki Bishop na kylleng ka pyrthei kiba la shim bynta ha katei ka prokram ha ki kynhun kynhun.
Na India ki don phra ngut ki Bishop kynthup ia u Bishop ka Dibrugarh bad Bishop ka Tura kiba leit sha Vatican.
Kiwei pat kikynthup naduh Pakistan, Sri Lanka, Myanmar, Vietnam, Japan bad Korea.
Ia kitei ki Bishop baroh, u Kpa Bakhuid u la kynduh ha ka Apostolic Palace mar ia wan na Kazakhistan bad ioh ban syllok bad ki kumba ar kynta ei ei .
Ha ka jingkynduh, u la kren shphang ka jingleit jong u sha Kazakistan bad ruh halor ka jingdonkam ban don ka jingsyllok lang hapdeng ki kynhun niam bad khamtam eh ban wanrah iaka suk ka sain.
U Kpa Bakhuid dang shen u la don ha ka jingshitom kaba la buh jingeh na ka daw ka jingshitom ha ka khohsiew bad kane ka la ktah ia ka jingthmu leit jong u sha kylleng ki ri ka pyrthei kynthup ia ka jingthmu leit sha Sudan kaba u la pynsangeh noh. Kumban shu kdew hangne u Kpa Bakhuid dangshen ula thung ruh sa arngut ki Cardinal ha India.
