Iakynduh ki MDC ia u CEM ka KHADC | Dawa pyllait noh ia ki skhim ka 15th Finance Commission

Shillong, Nailar 19 : Ki MDC ba ialam da u Nongialam ka Liang Pyrshah ka Khasi Hills Autonomous District Council Bah Titosstarwell Chyne, ha ka sng Ba-ar, kila dawa ia u Chief Executive Member (CEM) Bah Shemborlang Rynjah, ban pynkloi noh ia ki kam ha kaban pyllait noh ia ka song pisa ban pyntreikam ia ki skhim bapher bapher bala mang hapoh ka 15th Finance Commission.

Haba kren sha ki nongthoh khubor hadien ka jingiakynduh markhmat ia u CEM, u bah Titosstar ula ong ba kane ka dei ka sien ba nyngkong eh ia ka kynhun ka Liang Pyrshah ban iakynduh ia u CEM naduh ba u shimti ia ka Ophis mynta la hynriew bnai.

“Hadien ba iohi ba bun ki kam ba kongsan kila shu sahkut lut kaba la ktah ia ka jingtreikam ba iaid beit iaid ryntih jong ka Council, kala pynbor ia ngi ban iakynduh ia u CEM bad pan jingpynshai halor ki katto katne ki mat ba kongsan kiba dei na ka bynta ka bit ka biang jong ki paidbah” ula ong.

U Bah Titos ula pyntip ba kawei na ki mat ba la iakren hakhmat eh ha kane ka jingiakynduh ka dei ka jingpynsangeh kynsan kynsan ia ka jingsiew ia ki bill ba iadei bad ki skhim bala mang hapoh ka 15th Finance Commission.

Ula kdew ba ka Executive Committee kaba rim kala pyllait ia kasong pisa sha baroh ki MDC bad kila sam ruh ia ki work order hashuwa ka elekshon MDC 2024.

“Hynrei, ngi la ioh ia ka shithi bala aiti da ki contractor ba pyntip ba kala don ka jingpynsangeh ha ka jingsiew ia ki bill, ia kaba ka Council kala ai daw ba don ka jingthut ha ki kor ki bor” ong u Bah Titos haba bynrap “Ngi la rah iakren ia kane ka kam ha ka jingiakynduh ia u CEM. U CEM ula pynshai ba ka don ka jingthut ha ki kot ki bor. Ngi kyrmen ba ha kine ki khyndiat sngi ban wan, ka jingpyntreikam ia ki skhim hapoh ka 15th Finance Commission kin sdang biang namar kane ia ka pisa la siew online na ka bynta kine ki skhim baroh”.

“Ngi kyntu ia ki contractor/nongioh bynta ban iai shah bad ngi naba ngi la dep iakren ia kane ka kam bad u CEM” ula ong haba iai ban ba ka jingpynslem ban pyllait ia ki bill khlem pep ka ktah ia ki contractor bad kito kiba pyntreikam ia ki skhim.

“Ngi la kyntu ruh ia u CEM ban pynsted noh ha kaban pyllait ia kiwei pat ki jingsiew jong ki bill kiba la sahteng la bun bun bnai. Kumba ngi tip, hangne ha KHADC, ngi hap ban kynshew pisa nalade ban pyntreikam ia kiskhim bapher bapher bad hadien ngin sa ioh ia ka bill. Kumta, kan ktah jur bha lada don ka jingpynslem” bynrap u Bah Titos.

Kawei pat ka kam ba iakren ka dei ka jingslem ban ioh ia ka 2nd installment jong ka song pisa u snem 2021-22, kiba dei jong ka Tied bad Untied grant.

“U CEM ula pyntip ba ka jingtyrwa ia kane lah dep ban aiti da ka Executive Committee kaba rim, hynrei ka Council kan dang ban ioh ia ka song pisa na Delhi” pyntip u Bah Titos.

“Ka jingtyrwa ia kine ki skhim lah dep ban aiti da ka Executive Committee kaba rim. Ia kine ki skhim yn sa pyntreikam da kane ka samoi ba mynta. Hynrei, ngi dang don ha ka jingsah umdum” ong u Bah Titos haba pynpaw ia ka jingsngewhia ba kano kano ka jingpynslem ban aiti ia ki work order kan pyn jah burom ia ki MDC.

Haba kylli, u Bah Titos ula ong “U (CEM) khlem ai satia ia kano kano ka jingkular hynrei ula shu pynpaw b aka shong ha ka jingpyntreikam ia ka installment ba nyngkong”.

Halor ka bynta jong ka Council ba iadei bad ki nongbylla poi ei, u Bah Titos ula ong ba u CEM u khlem lah satia ban ai ia kano kano ka jingpynshai da kaba onng ba kane ka kam ka dang wan sha ka jingtip jong u dang mynta hi ka sngi. U CEM ula kular ban pan ia ka jingpynshai na u Executive Member ba dei khmih ia kane ka kam.

Haba iadei bad ki kam Elaka, u Bah Titos ula iathuh ba ka Liang Pyrshah kala ai jingmut ia ka jingdon kam ban iasyllok bad ki MDC ka thain halor kano kano ka kam Eleka. “Hooid, ngim lah ban tuklar ia ka jingtreikam jong ka EC hynrei ngi shu kyrpad ba ka EC ba kan iasylloh lane shim lem ia ka jingpyn sngew u MDC ka thain halor ki kam ba iadei bad ki Elaka” ula bynrap.