Shillong, Nailar 17 : U Myntri Rangbah ka Jylla Meghalaya Conrad K Sangma ha ka sngi Saitjain ula iakynduh ia u Myntri Rangbah ka Assam Himanta Biswa Sarma ha Guwahati bad iakren ia bun bah ki kam ba iadei hapdeng ki arjylla. Hynrei, ym lah pat ban tip la ka mat iakren pynbeit pud ka mih ne em haka jingiakren.
“Nga sngewtynnad ban iakynduh bad u Myntri Rangbah ka Assam, Dr Himanta Biswa Sarma ha Guwahati ban iakren halor ka jingnang pynskhem ia ka jingiadei hapdeng ki ar jylla bad iathaw ia ki lad ki lynti ban nang pynkhlain ia ka jingiatreilang” ong u Conrad ha X.
U Myntri Rangbah ka Assam Himanta Biswa Sarma ruh ula pyntip ia ka jingsngewhun jong u halor kane ka jingialang bad ong “Mynta ka sngi, ha Guwahati, Nga la ioh iakren bad u Myntri Rangbah ka Assam Shri @Sangma Conrad Ji. Ngi iakren ia bun bah ki mat ban pynkhlain ia ka jingiakiew lang kumjuh hapdeng ki ar Jylla” thoh u Himanta ha X khlem da batai bniah ia kiei kiei ruh.
Ki arngut ki Myntri Rangbah kila iakynduh khatduh eh ha ka 2 tarik Jylliew bad iarai ban pynieng noh ia u mawpud ha ki san tylli ki jaka na ki hynriew tylli ki jaka bala iadep pynbeit iaki jingiakajia.
U Myntri Rangbah ka Meghalaya ula ong ha ka jingkren ha ka jingrakhe Independence Day ba ka kam kala iaid shakhmat ha kaban pynbeit noh ia ka jingiakajia pud kaba sahteng la bun phew snem bad ka Assam kynthup ka jingpyndep ban pyn ieng ia ki mawpud ha ka thain Hahim kat kum ka MoU bala iasoi.
Kine ki ar Jylla kila iasoi ia ka soskular ha u Lber 2022 ban pynkut noh ia ka jingiakajia ha ki hynriew tylli ki jaka napdeng ki khat-ar tylli kiba don ha u pud ba jrong kumba 884.9 km.
Ka Meghalaya kaba la pynkha na Assam ha u snem 1972, kala tynjuh pyrshah ia ka Assam Reorganisation Act u snem 1971, kaba wanrah ia ka jingiakajia pud ha ki 12 tylli ki jaka. Ban weng noh ia kane ka jingeh, kine ki Jylla kila thaw ia ki Regonal Committee ha u snem 2021, bad da ka jingai jingmut jong ki, la lam sha ka jingiasoi ia ka Memorandum of Understanding ha ka 29 tarik Lber, 2022.
Hapoh kane ka soskular, haduh 36.79 km na ki jaka ba iaka jia la iaphiah mar katjuh hapdeng ki ar jylla ha kaba ka Assam kala ioh 18.51 sq km bad ka Meghalaya kala ioh 18.28 sq km.
