Shillong, Jymmang 23 : Ka Khasi Students Union (KSU) War Jaintia Circle kala iakynduh ia u CEO ka Land Port Authority of India (LPAI) bad dawa ban thungkam ia ki samla ka Jylla ha ka Land Port ha Tamabil.
Ia kane ka kynhun ka KSU la ialam da u General Secretary Lurman B Talang, finance secretary Kindly Khyriem, organizing secretary Standy Khongnoh, Ilashmin Khonglah bad Pascal Khonglah.
Ha ka jingialang bad u CEO ka LPAI, ka KSU kala kyntu ban ailad nyngkong shuwa ia ki trai shnong khamtam kito kiba la pyndep ia ki jingpule haba phai sha ki lad iohkam ha Land Port ha Tamabil.
Ka KSU kala pynkynmaw ruh ia u CEO ban khanglad ia ki mynder ba kin wan knieh ia ka kamai jakpoh jong ki trai shnong kiba shong ba sah ha ki shnong khappud.
U CEO ula kular ia ka KSU ba un sa khmih ia ka jingdawa jong ki bad ban pynthikna ba ki mynder kin nym ioh kam satia ha Land Port Tamabil. Ula ban jur ruh bad tang ki samla bala pyndep ia ki kyrdan pule kin dei kiba pdiang da ka LPAI.
Ka KSU kala maham ruh ia kiwei kiba wan ban trei ha ka Land Port ba ki dei ban ioh ia baroh ki kot ki sla ba donkam kat kum ka ain.
