Nongstoiñ, Jymmang 23: Ka Kynhun ki Nongkitkam ka Voice of the People Party (VPP), hynne ka sngi Ba-ar, kila iatur bad shong kyllain mungor ha khyrdop ka Iingsah u MLA ka Nongstoin Bah Gabriel Wahlang halor ka jingkynnoh ba sngap jar jar ia ka jingeh ban sa iakynduh da ki Samla ka Jylla.
Kine ki Nongkitkam ka VPP kila rah ryngkat ki placard kiba kynthoh ia ka jingkuman ka Sorkar ban shong bishar thymmai ia ka State Reservation Policy. Kane ka jingiatur sha Iing u MLA kala jia ruh ha ka por ba u President ka VPP bad MLA ka Nongkrem Bah Ardent M Basaiawmoit, ula sdang ia ka jingshong shah jingit hajan Secretariat.
Katei ka kynhun kaba la poi ha ïing utei u nongmihkhmat ha ka por 3 baje ei ei ha ka shnong Pyndengrei. Ka la ong ba katei ka jingleh ka jong ki ka long shi bynta ban pynbor ïa u nongmihkhmat jong ka thaiñ, ba un kren ei ei bad ban kyrshan ïa ka jingïakhih jong ka seng VPP hapoh ka jingïalam jong u bah Ardent Miller Basaïawmoit.
Ïa katei ka kynhun la lamkhmat da u bah Davis Franki Wahlang Joint Secretary ka seng Voice of the People’s Party Nongstoiñ Pyllun.
Ha ka jingïakren bad ki nongthoh khubor utei u secretary u la ong ba ha ka jingshisha u bah Gabriel Wahlang kum u Nongmihkhmat u lah dei ban kren ha ïing dorbar thaw aiñ halor ka mat kaba kongsan ba ka jaidbynriew ka ïakhun mynta ban ïoh, kata ka dei halor ka jingpynkylla ïa ka Reservation Policy.
“Haba um kren ei ei ka paw ba um don ka jingkitkhlieh ïa ka lawei ki khun samla jong ka jaidbynriew. Kane ka dang dei tang ka dak kaba rit jong jingsdang ka jingïakhih bad yn leh kham tyngeh nangne shakhmat”, u la ong.
