Shillong, Nailur 23: Ka seng Jaintia Students Union (JSU) hynne ka 23 tarik u Nailur kala leit iakynduh ia ki heh jong ki shipai BSF ba kim dei ban pyndik ne pynwit ia ka leit ka wan jong ki nongshong shnong haka thaiñ Amlarem, West Jaintia Hills District.
Ka JSU hapoh ka jingialam jong u General Secretary u samla Treibor R Suchen kila leit iakynduh ia u Commandant ka BSF Dawki bad u Sub Inspector ka BSF ban pynsngew iaka jingeh kaba u paidbah u iakynduh naka jingshah pyndik ha ki shipai BSF.
U samla Treibor u la ong, ba ki heh jong ka BSF kila iathuh ba katei ka ktem kaba ki buh ha surok Amlarem kadei ka Joint Mobile Check Post kaban don tang shipor bad kam dei satia kaban pynïeng shi rta ha katei ka jaka.
“Ngi la ong, ia u Commandant ka BSF Dawki bad iaki BSF kiba don ha katei ka jaka, ba kim dei ban pyndik iaka leit ka wan ki paitbah nongshong shnong ka thaiñ namar kadei ruh ka jaka kaba ki nongjngohkai pyrthei ki ju wan, kumta ka lah ban ktah iaki nongjngohkai pyrthei sha ka thaiñ” ong u samla Treibor.
U la iathuh, ka seng kala dawa ruh na ki heh jong ka BSF ba kidei ban peitngor iaka jingrung jingmih tuh ki khar Bangla sha ri India lyngba ki khappud jong ka thaiñ War Jaintia baroh kawei.
U nongialam ka JSU ula ong, ka jingbuh ktem shipai jong ki BSF ha Amlarem kam don jingmut lada ka rukom pahara ha khappud ka long kaba synjor bad kam myntoi iaki BSF kin buh jaka ap pahara shaduh sha Amlarem watla ka aiñ ka shah iaki ban ap.
