Shillong, Nailur 21 : Ka Mawkhar ka la iakhun tyngeh ban pyniakhaid da mar 2-2 kol bad ka Nangkiew Irat ha ka jingiakhun kaba khatduh jong ka Shillong Premier League kaba long hynne ka sngi ha madan Third Ground Polo.
Ha ka jingiakhun, dei ka Nangkiew Irat kaba ioh ban thep kol nyngkong tang ha ka minit kaba 5 mar ia sdang ka jingialehkai lyngba u Lambor Nongsiej. Ka kynhun kaba la ioh ban tehlakam na ba sdang jong ka jingialehkai ka la ioh biang ban thep sa shi kol ha ka minit kaba 29 sa ia ka kol kaba ar na u Overkindness Lyngdoh.
Ka jingiakhun ha ka kylla step ka la kut noh hadien ba ka Nangkiew Irat ka la ioh ban thep haduh 2-0 kol ia ka Mawkhar.
Hynrei khlem poi pyrkhat ka jingiakhun ha ka kylla miet ka la kylla namar ka Mawkhar ka la iakhun met bad mynsiem ban ioh pynphai kol bad kane ka la urlong namar dei ha ka minit kaba 62 jong ka kylla miet ka la ioh ban pynphai shwa shi kol lyngba ka kol ba ioh ban thep da u AIbiang Nongneng.
Ym slem hadien kane ka la ioh ban thep sa ia ka kol kaba ar kaba pyniakhaid artad mar 2-2 kol ia ka jingiakhun lyngba ka kol ba ioh ban thep da u Roland Kharsyntiew ha ka minit kaba khatduh kata ha ka minit kaba 90+2.
Ka jingiakhun kaba bud pat kan long ha ka 26tarik mynta u bnai hapdeng ka Rangdajied United FC pyrshah ia ka Ryntih FC ha ka por 3:15 baje janmiet.
