Shillong, K’lyngkot 15 : Ka sorkar MDA ba ialam da u Conrad K Sangma, kala rai ban khot ia baroh ki kynhun bapher bapher kynthup ki seng sain syrthei bad sengbhalang ban iakren halor ka jingtyrwa pynrung ia ki kyndon ba iasyriem kum ka ILP ha ka Immigration and Foreigners Act, 2025, da ka jingthmu ban tem ia ka jing wan rung kyrthep ki briew nabar ka Jylla bad mynder ri.
“Ngin sa khot ia baroh ki seng sain pyrthei bad sengbhalang ban iakrren ia kane ka jingtyrwa” ong u Myntri Rangbah Conrad K Sangma haba iakren bad ki lad pathai khubor ha ka sngi Palei haba kren halor ki jingpyr shah ia kane ka jingtyrwa khlem da tip ia ki symboh.
“Kam long kaba dei ia ngi ban shu ia shim rai khlem da iohi shuwa ia ki symboh ba don ha ka jingtyrwa bad ia kane ka ain baroh kawei ba kumno ngin pyniaid shakhmat ia ka” ula ong.
U Conrad ula ban jur ia ka jingdonkam ban don ia ka jingmut kaba tei haba ong “Ka mat jong ngi ka dei ka jingwan rung beain ki mynder. Ka mat hi kam dei ka ILP, ka mat kam dei ka Immigration Act, ka mat kam dei ka MRSSA…Ngi donkam ia ka Ain, ngi donkam ia ki lad ki lynti ban tehlakam ia ka”.
Ula kyntu ia ki liang pyrshah ban wan sha ka jingiakren bad pynpaw “Ngim ong ba kaei kaba ngi tyrwa kan dei kaba biang, ngi lah ban bakla…hynrei Nga tharai ngi lah ban shim ia kata ka rai lada ngi lah ban pynlong ia ka jingiasyllok lane iakren mar kylliang”.
Kat kum ka jingong jong u, ka Sorkar ka thmu ban pynbiang tarajur ia ka jingdonkam ban pyrrkhing ia ka jing wan rung beain ki mynder ri bad ka jingsngewkhia jong ki paidbah bad ki kynhun sengbhalang.
“Ngi dang pyrshang ban leh ia kata bad ngi la pyrshang ban pyniaid shakhmat ban peit la kane ka dei ne em ka lynti”ong u Myntri Rangbah.
“Ngi donkam ban iakren ia kane. Ngin sa khot ia ki seng sain pyrthei, ki seng bapher bapher ban iakren ia kane ka mat bad khlem pep ba hadien ba ngi la ioh jingshai bad jingpynsngew ia baroh ia kaei kaba ngi thmu ban jam shakhmat bad kane bad ngi ioh ruh ia ka jingmynjurna baroh, hangta ngin sa pyrshang ban pyniaid shakhmat ia ka kam” ula ong.
“Ngi dang shu pyrshang ban phai khmat sha kane ka lynti hynrei phi la shu ong em beit beit…nga tharai kane kam dei kum ki seng sain pyrthei ne ki nongialam lane kum ki sengbhalang ban shu shim kumta. Ngi donkam ia ka jingiakren bad tad hadien ka jingiasngewthuh ba ki don kiei kiei kiba kim mynjur, ngin pyrshang ban wad ia ki lad ki lyntu ban pynbeit lane wanrah da kaba thymmai hynrei kane baroh ka donkam ia ka jingiakren. Kaei kaba ngi ong mynta ka long ba ka don pat kawei ka lynti bad to ngin khmih bniah ia ka. To ngin peit la ka lah ne em ban pyrrkhing ia ka jingwan rung beain ki mynder bad tehlakam ia ka jingrung kyrthep ki briew nabar” ula bynrap.
Haba kyntait ia ka jingkam u Nongialam ka Liang Pyrshah Mukul Sangma ba ong ba ka Sorkar kam shym la lah ban pyntreikam ia ka Meghalaya Residents Safety and Security Act (MRSSA), u CM ula ong “Ka MRSSA ka lah treikam mynta bad bun ki shnong kila pyntrei ia ka”.
U Conrad ula kubur ia ki jingeh ha ka jingpyntreikam, haba kdew ia ki jingdonkam ha ka liang ki jingtei bad ka jingkynshew pisa, hynrei ula ban jur ia ka jingiaid shakhmat ka kam ha kiba bun ki jaka”.
Halor ka jingkob u Mukul ia ka Sorkar ban wanrah ia ka ain thymmai lada kim shaniah ia ka MRSSA, u CM ula ong “Ban wanrah ia ka ain ba thymmai, ka system ba thymmai, kane ka dei kaba ngi iakren mynta….ki don katto katne ki jingeh ha ka MRSSA”.
Ula kren halor ka jingduna hapdeng ka Act bad ka Rules haba ai niksa ia ka entry bad exit checkpoint. “Kum ka nuksa, ka rules ka kren shaphang ka entry-exit point hynrei lada phi peit pat ia ka Act, ka Act kam don satia ia kano kano ka kyndon ba ong ba ngi lah ban pynieng ia ki check point. Baroh ngi tip ba ki rules ki dei kiba shna kat kum ki kyndon ka Act bad lada ka Act kam don ia ka kyndon ba lah ban pynieng checkpoint, ka rule kam lah ban ong ba ngi lah ban don ia ki checkpoint”.
U Conrad ula ban jur ia ka jingdonkam ka jingiakren bad ong “Ngi sngew ba ngi donkam ban iakren ia kane bad dei na kata ka daw ngi la iakren ia kane ka phang…kynthup ki seng sain pyrthei, sengbhalang, bad ngin sa iapeit kumno ngin lah ban pynurlong ia kaei kaba ngi kwah”.
