Itanagar, Nailar 12: Ha ka jingjia ka bym pat ju jia koit, khyndiat sngi hadien ka jingpulom ha ka jingpyrshang jong ki lehnoh NSCN-K(YA) ban wan rung na ki bynta jong ka Myanmar bad ban ther kuli ia ka jaka shong jong ki shipai Assam Rifles ha Kunsa, na ka liang ki nongshong shnong jong ka shnong Kunsa da ka jingbitar ki la pynlong da ka jingiakhih paidbah hynnin ka sngi Palei ban pynpaw pyrshah ia katei ka kam thombor jong ki lehnoh.
Ki nongshong shnong ki la rah ruh ryngkat ki plakad ban pynrem ia katei ka jingther kuli jong ki lehnoh bad pynpaw ruh halor ka jingdonkam ban pynneh ia ka shongsuk shongsain ha kane ka jaka.
Ha ka ba nyngkong, ki trai shnong ki la thang ia ka dur tyngshop jong u nongialam katei ka kynhun seng lehnoh NSCN- K(YA), u Major General Payong Konyak da ka ba kynnoh pyrshah ia u halor katei ka jingjia.
Kine ki nongshong shnong ka ba kynthup ia ki longkmie bad ki khynnah ki la wan shakhmat ban pynpaw pyrshah ia ki kam pyntriem jong ki kynhun seng lehnoh bad pynpaw ka jingiatylli bad ki bor pahara.
Ki ba kum kine ki jingiakhih pyrshah lehnoh ha ki bor ki ba la dep la pynlong da ki trai shnong jong ka Longding bad ka Tirap district, ong shuh shuh ka jingthoh na ka liang ka tnat shipai.
