Shillong, Nailar 07 : Ki nongshong dukan na Laitumkhrah kila pynlong ia ka jingiakhih kaba la iaid la lai sngi hynne ka sngi Palei hakhmat ka Ophis ka Shillong Municipal Board, ban pynrem ia kaei kaba ki ong ba ka dei ka jingpynkylla ia ka rai haba iadei bad ka jingpynkynriah ia ki.
Ki nongiakhih kila pynpaw ba kila dep leit jngoh ia bun ki jaka bad ai jingmut ruh ia ki jaka kaba ki mynjur ban kynriah, kynthup ka Iew Laitumkhrah ba dang tei thymmai, ka shi lynter ka surok Fire Brigade, ka Health Complex bad kiwei ki jaka.
Wat hapdeng kane, ki kynnoh ba ki bor pyniaid ka Municipal kila pynkylla ia ka jingthmu pynkynriah ia ki khlem da khot iasyllok.
Ki nongshong dukan madan kila dawa ba ki bor pyniaid ki dei ban burom ia ki jingai jingmut ba hashuwa bad rai ia ki jaka ban pynkynriah ia ki da kaba iasyllok shuwa bad ki.
