Shillong, Nailar 06 : Kum ka jingnang pynkhlain ia ka National People’s Party (NPP) kaba don ha ka Liang Synshar, bun ngut ki nongialam bad ki dkhot na ka Voice of the People Party (VPP), Congress, BJP bad United Democratic Party (UDP) kila leit pyniasoh ialade sha ka NPP ha ka sngi Palei, ban kyrshan ia u kyrtong Dr DRL Nonglait ha ka elekshon shiteng samoi ban wan ka Shillong Lok Sabha.
Ia kine ki nongialam bad dkhot na kiwei ki seng sain pyrthei la pdiang sngewbha da u National Vice President ka NPP bad Symbud Myntri Rangbah ka Jylla Bah Sniawbhalang Dhar ha ka jingialang ialap elekshon ba long hapoh ka shnong Rymbai, East Jaintia Hills.
Ka MLA ka NPP na Sutnga-Saipung kong Santa Mary Shylla bad kiwei ki nongialam ka party kila iadonlang ha kane ka jingialang.
Haba kren ha ka jingialang, u Dr Nonglait ula ong ba ka jingwan iasoh ki nongialam na kiwei pat ki seng sain pyrthei kan nang pynkhlain shuh shuh ia ka NPP ha kane ka elekshon shiteng samoi ban wan.
“Bun ki nongialam kila wan ban iasoh sha ka NPP. KIla rai mynta ka sngi ban iatreilang noh bad ka NPP. Ngi tip ba ngi la don lypa ia ka vote bank bad ka jingkyrshan jong kiba bun ki paidbah ia ka party…..” ong u Dr Nonglait.
“Ka jingwan jong kine ki nongialam ban ai ka jingkyrshan bad ruh ban iasoh bad ka party, Nga ngeit, kan iarap ia ngi ban ioh ia ka jingjop kaba don burom bha ha kane ka elekshon shiteng samoi. Phi la iarai, nongialam, ban iasoh bad ka NPP bad ga ngeit ba ki thong jong phi ka long ban pynthikna ia ka jingjop jong u kyrteng ka party, Dr Nonglait. Khublei shibun ia phi baroh” ula bynrap.
Haba kren halor ka jingmih kum u kyrtong, u Dr Nonglait ula ong ba ula pdiang ia ka jingtyrwa ka NPP haba pynshong nongrim na ka jingtreikam jong ka Sorkar ba ialam ka NPP hapoh ka Jylla.
“Nga la pdiang ia ka jingtyrwa ka party ban long u kyrtong ha kane ka MP by-elekshon mynta u snem. Ka daw hi ka long ba nga la iohi ia ka jingtreikam jong kane ka Sorkar ba ialam ka NPP, kaba la pynhun ia nga. Nga la bishar bha bad da sngewhun ia kaei kaba la leh ha ka Jylla, bad ruh halor ka jingdonkam ia ka roi ka par bad ka jingkieew jong ki paidbah ka Jylla” ula ong.
