Shillong, Nailar 07 : U Nongialam ka BJP bad MLA ka Pynthorumkhrah Bah AL Hek ula ong ba ka party kan ym kyrshan satia ia ka jingtih uranium ha Meghalaya lada ki paidbah ki pyrshah ia ka, haba kyntait pat ban pdiang ia ka jingdawa khang khyrdep ia ka ophis ka Atomic Minerals Directorate (AMD) ha Shillong.
Haba kren sha ki lad pathai khubor, u Bah Hek ula kren shai baka nongrim jong ka BJP ka long kat kum ka jingsngew u paidbah.
“Katba ki paidbah kim kwah ban tih uranium, ngi ruh ngim kwah ban iaid pyrshah ia ka bha ka miat u paidbah” ula ong.
“Nga la ong ha phi naduh kaba sdang ba kum ka Sorkar ngim lah ban iaid pyrshah ia ka bha ka miat u paidbah. Kumta, haba ki paidbah kim kwah tih uranium, ngi ruh ngi don ryngkat bad ki paidbah ka Jylla” ula bynrap.
Halor ka jingdawa ban weng noh ia ka Ophis ka AMD na Shillong, u Bah Hek ula ong ba kam don daw satia ban leh ia kane.
“Balei ban weng ia ka?. Ngi la ong ba ngin nym ailad ban tih uranium. Hynrei kumno phi lah ban ong ba dei ban weng noh ia ka Ophis ka AMD na Shillong? Ia kane hi ngam mynjur satia” ula ong.
U Bah Hek ula pynksan ba ki nongtrei ka AMD kila trei iala ki jong ki kam kum ki nongtrei ka Sorkar Pdeng bad ka jingdon jong ki hangne kam mut ba ka jingtih par kan jia.
“Ki dei ki nongtrei Sorkar. Kila trei kumba treikam ki Ophis ka Sorkar. Shisien ba ka Sorkar Meghalaya bad ki paidbah kim shah ban tih uranium, ka kut noh hangne” ula ong.
 ha Shillong.){kind=link}