spot_img

Iakhih ki Nonghikai Adhoc hakhmat Secretariat ba khlem pynkiew tulop ka Sorkar

Date:

Share post:

Shillong, Jylliew 28: Ki Nonghikai Adhoc kiba don ha ka shatri jong ka Federation of All School Teachers of Meghalaya (FASTOM) hynne ka sngi ba-ar, kila sdang biang ia ka jingiakhih da kaba shong kyllain mungor khlem pud hakhmat ka Secretariat ban pynpaw ia ka jingpyrshah halor ka jingbym lah jong ka Sorkar ban pynkiew ia ka tulop.

Kane ka rai iakhih kala mih tang shisngi hadien ba u Myntri Rangbah ka Jylla Conrad Kongkal Sangma ula pynlong ia ka jingialang jong ka Kynhun Myntri, ka bym shym la iakren ia ka jingdawa bala buh hakhmat da ki Nonghikai Adhoc.

Haba iakren bad ki Nongthoh khubor, u Nongaiktien ka FASTOM Bah Mayborn Lyngdoh ula ong “Ngi la rai ban mih biang sha surok namar la shet kylla ia ngi da ka sorkar Meghalaya Democratic Alliance (MDA)”.

Ula ong baka Sorkar Jylla kam shym la lah ban shim ia kano kano ka rai ban pynurlong iala ka jingkular haba iadei bad ka jingpyntreikam ia ki jingdawa jong ki Nonghikai wat hadien lai sien ki jingialang jong ka Kynhun Myntri.

“Ha ka jingiakynduh jong ngi ia u Myntri Rangbah bad Additional Chief Secretary ha ka 12 tarik Jymmang, la kular ia ngi ba ka sorkar ka donkam tang lai tylli ki sien shong jingialang jong ka Kynhun Myntri ban pynbeit ia ka jingeh jong ki Nonghikai Adhoc. Hynrei, ka jingialang jong ka Kynhun Myntri kala dep iaid lai sien bad ngi sngewthuh ba ka sorkar kala shukor ia ngi bad kala shet kylla ia ngi” ong u Bah Mayborn.

Namar kata, u iathuh baka FASTOM kala rai ban bat iala ka jong ka rai bala shim ha ka 12 tarik Jymmang kata “Ba ngin mih biang bad iathiah ha ki surok ka Nongbah Shillong lada ka Sorkar kam leh eiei noh ia ki jingdawa ki jong ngi”.

Ki Nonghikai Adhoc kila dawa ban pynkiew ia ka tulop ba T. 18000 bad ka increment ba 5% shisnem.

Haba kylli, u Bah Mayborn ula ong ba ki Nonghikai kim kwah shuh ban nang iakren bad ka Sorkar haba ong “Ka por ban iakren kala kut, mynta ka Sorkar ka dei ban pynmih noh mardor ia ka hukum ban pyntreikam ia ki jingdawa jong ngi. Lada ngim ioh ia kane ka hukum, ngin iathiah ha surok tad haduh ba ka sorkar ka la lah ban pyntreikam ia ki jingkular”.

Ia kane ka rai jong ki Nonghikai Adhoc la rah ktien ruh lyngba ka shithi bala phah sha u Myntri Rangbah ka Jylla bad ki Myntri Sorkar naduh ka 12 tarik u Jylliew.

Ha kajuh ka por, une u Nongaiktien ka FASTOM ula ong ba ki Nonghikai kila kular ban pynphai ia 2 % n aka 5 % ka increment ha ka dur jong ka Professional tax, lada ka Sorkar ka don hapdeng ka jingkyrduh pisa.

Share post:

spot_img
spot_img

Popular

More like this
Related

Kular ka DGP ban leh eiei halor ki nongpynkulmar shnong bad ki jingeh ki PWD

Shillong, Jymmang 30: Ka Director General of Police (DGP)...

Kurup ka Tnad Custom ia ka bniat hati ba khia 27 kilo

Shillong, Jymmang 30 : Ha ka jingkhynra pyrshah ia...

Kyndit ka KSU ba phah pyniasoh ka Sorkar ia ki College sha ka Williamson Sangma University

Shillong Jymmang 30: Ka Khasi Students Union kala pynpaw...

Plie ka DGP ia ka jingkhang ban sngap ia ki jingeh bad jingai jingmut ki paidbah

Shillong, Jymmang 30: Kum shi bynta ban tei iaka...
spot_img