Shillong, Nailur 2: Kumba 321 ngut kiba la pyndep ia ka Vocational Training hapoh jong ka Meghalaya Vocational Education Trainers’ Union kila pynlong ia ka jingiakhih kaba jaijai hynne ka sngi Balang ban dawa ban pynkiew noh ia ka jingsiew kaban ia ryngkat hapoh jong ka ‘Equal Work Equal Pay”.
Kine ki Trainers, kiba khmih ia ka klas IX haduh XII ha kylleng ki Secondary bad Higher Secondary School, kila ong ba kila iai tynruh ia katei ka jingdawa lah bun snem hynrei kim shim la ioh ia kano kano ka jubab na ka sorkar.
U President u Bah Aiban Suchiang ula ong, ba ki Trainers kila dep iakynduh ia u Myntri Rangbah ka Jylla Conrad K Sangma ha u bnai Jymmang ha Madan Students, Jaiaw ha ka por ba ula sangeh ia ka kali bad ula iakren bad ai ka jingpynthikna ba un sa khot iakren ia ki.
Katei ka jingkular, ula ong kam shim la urlong satia.
“Ka jingdawa ka jong ngi ka long kaba shai bha, ka jingpynkiew bad ban ai ia ka jingsiew kaba thymmai kaban pynthikna ba ka jingtrei kumjuh ia ka kam bad ka jingioh kaba mar kumjuh. Kane ka lah sahteng lah slem bha” ong u Bah Suchiang.
Katkum ka jingpynpaw ka Union, ki Trainers kiba khmih ia ki Secondary Classes (IX-X) kiba la tam 3 snem ha ka jingai jingshakri ki iohpdiang T.24,000, katba kito kiba khmih lang ia ka Secondary bad Higher Secondary (IX-XII) palat ia ka 3 snem ki ioh T.30,000.
“Katei ka jingsiew kam long kaba iahap bad ka kam kaba ki trei. Ngi hikai naduh na ka kyrdan Secondary haduh Higher Secondary bad ki sobjek ki jong ngi kidei kiba bun bha kiba leh da ki ‘Practical’, ha kaba 30 Marks la ai ha ka Theory, 50 ha ka Practical bad 20 kum ka Internal” ong u Bah Suchiang.
Ka jingai jinghikai ka jong ki ha ka Vocational Trades ka kynthup ia ka Information Technology, Electronics, Tourism & Hospitality, Beauty & Wellness, Healthcare bad kiwei kiwei.
U Bah Suchiang ula ong, ba ka Union kala pynlong khnang ia ka jingiakhih kaba rit ha ka sngi Balang hynrei ula maham pat ba ka lah ban nang jur lada ka sorkar ka iai bteng ban leh bym patiaw ia ka jingdawa ka jong ki.
“Kane ka jingiakhih mynta ka sngi ka long kaba jaijai. Ngim shim la kwah ban lum ia ki paitbah shibun. Ha ka sien kaban wan, lada ka sorkar kam khot iakren ia ngi bad kam sngap, ngin sa pyrkhat ban shim noh da kiwei pat ki rukom iakhih bad ngin wan ryngkat bad bun bah u paitbah” ula bynrap.
Ka Union kala ong, ba kane ka jingdawa kadei kaba la slem bha bad ka jingbym shimkhia kala pynbor ia ki ban mih sha surok.
