Agartala, Nailur 1: Ka BJP ka la pynkhreh ban iakhun hi marwei ha baroh ki seat jong ka elekshon Village Committee ka TTAADC ban wan lada ka jingiapynbeit ban iatreilang bad ka Tipra Motha kam urlong, ong u president ka BJP Abhishek Deb Roy ha ka sngi Balang.
Haba kren shabar jong ka jingialang ha ophis treikam ka BJP ha Agartala, u Deb Roy u la ong ba ka party ka la pynkhreh pura na ka bynta ka elekshon bad ia ki prokram jong ka seng kiba iadei bad kane ka elekshon.
“Ngi la pynkhreh ban sei kyrtong na ka bynta baroh ki seat”, u la ong haba kylli la ka BJP ka la pynkhreh ne em ban ia khun elekshon da lade.
Hynrei u Dr Rajdeep Roy in-charge ka BJP na Tripura u la ong ba ka jingiakren halor ka jingiateh lok bad ka Tipra Motha ka dang iaid shakhmat.
“Ki jingiakren ha kaba ia dei bad ka jingiateh lok ki dang iaid shakhmat To ngin ia peit; baroh yn sa iathuh ha phi ha ka por kaba biang”, u la ong.
Ka jingbym thikna halor ka jingpynbeit ia ka elekshon ka wan hapdeng ka jingiapher jingmut hapdeng ki ar tylli ki party kiba iatreilang halor ka jingpyntreikam ia ka Tripartite Agreement.
U nongseng jong ka Tipra Motha, u Pradyot Kishore Debbarma, u la pynskhem bunsien ba ka seng jong u, kan nym rung ha ka jingiateh elekshon bad ka BJP, lymda pyntreikam ia katei ka jingiateh.
Ha ka jingialang ba la long ha ka sngi Balang la don lang u BJP national general secretary (organisation) B.L. Santhosh, Northeast in-charge Sambit Patra, Northeast coordinator Rajeev Babbar, Chief Minister Dr Manik Saha, u Myntri Rangbah barim Biplab Kumar Deb bad kiwei de ki heh nongialam.
Ka jingialang ka la long halor ki mat, ka jinglong jingman ha ka sain pyrthei kaba mynta bad ka jingpynkhreh ia ka Village Committee elections kaban sa long ha kaba kut jong une u bnai.
