Shillong, Nohprah 17 : Ki kynhun Sengbhalang bapher bapher jong ki paid Garo, kila pynlong ia ka rally bad ka jingthang mombiti hynnin ka sngi Saitjain ha Aradonga ban pyrshah jur halor ka jingshah thombor ki arngut ki Nonghikai, kaba lam sha ka jingiap jong uwei napdeng jong ki.
Ki Sengbhalang kiba pynlong ia kane ka rally ki kynthup ia ka GSU, FKJGP, AHAM, ADE, HNYM, AYWO bad ki kynhun Self Help Group (SHG).
Kum ban shu pynkynmaw hangne, arggut ki Nonghikai ka skul Rangsapara Secondary School kaba don ha ki thain Langpih, kila shah thombor ha ka kynhun ki runar myn ha ka 11 tarik Nohprah katba ki dang wan na Nongstoin ban sei ia ka pisa jong ka skul.
Kane ka jingthombor kala jia ha shiliang ka Wah Tyrsung bad ha kane ka jingjia, uwei na kine kinonghikai ula iap hashen bad uwei ula mynsaw jur.
Une u Nonghikai uba iap u kyrteng u Tengton R Sangma ba 48 snem bad uba mynsaw u kyrteng u Surja Kumar Chetri ba 49 snem ka rta.
Haba pynrem jur ia kane ka jingjia, ki Kynhun Sengbhalang bad ki spah ngut ki paidbah ka thain Aradonga kila iamih paidbah hynnin ka sngi Saitjain ban iaid paidbah pyrshah ia kane ka jingjia bad kila pynlong ruh ia ka jingialang thang mombiti ban sngewlem ia kine ki lanot.
Kine ki Seng kila dawa ia ki bor ka Ain ba kin thwet jur ia ki runar kiba donkti bad ba dei ban kem mardor nalor ban pynngat ha ki kyndon ain kiba tyngeh.
