Shillong, K’lyngkot 10 : Ka Dorbar Chnong ka Tuber Kmai Chnong, East Jaintia Hills, kala pynlong ia ka jingiaid rally paidbah hynne ka sngi Balang ban pynpaw ia ka jingpyrshah halor ka jingshah shoh u Waheh Chnong Micky Diengdoh bad u Chairman ka Chnong Denis Lyngdoh.
Kine ki arngut kila shah shoh ha ka janmiet 3 tarik Kyllalyngkot ha uwei u briew ba kyrteng u Training Phawa.
La iathuh ba ha kane ka janmiet, kala mih ka jingkulmar hapdeng ki ar kynhun hapoh ka Shnong bad ia kane ka jingjia la pyntip mar mar sha ki Nongialam Shnong. Hadien kane, u Training Phawa ula wanrah da u side bad sdang thombor ia u Waheh Chnong bad ia u Secretary haduh ba arngut kila mynsaw.
Ia kine ki arngut la pynkit noh sha Jowai Civil Hospital bad hadien la pynkynriah sha Supercare Hospital, Shillong namar ka jingjur ka jingmynsaw.
La iathuh ba u Training Phawa u dei u dkhot sengbhalang bad u bat kam kum u Finance Secretary ka Jaintia National Council (HNC).
Da ki spah ngut ki paidbah kila iamih sha kane ka rally ha ryngkat ki lama iong bad ki placard kiba pynrem jur ia u Training Phawa uba la shoh bad pyrshang shim ia ka jingim jong kine ki nongialam Shnong.
Shuwa kane ka rally, kala don ka jingialang kaba lyngkot ha kaba u Waheh Chnong ula batai ia kaei kaba jia ha ka janmiet 3 tarik.
Kiwei pat kiba la kren ki kynthhup ia u General Secretary ka Shnong T Phawa, u Secretary ka VDP M Phawa bad u Waheh Chnong barim MB Sana. Baroh kine kila pynrem jur ia ka jingleh u Training Phawa bad kyntu ia ki nongshongshnong ba ki dei ban burom ia ki Nongialam bad ki nongkitkam shnong.
