Shillong Nailur 24: Ka nongbah Shillong hynne ka Sngi U Blei, kala rakhe iaka World Rivers Day 2023 da kaba pynlong iaka jingiaid rally kaba la tip kum ka ‘Life to Rivers Rally’, ha kaba palat 200 ngut kila wan ban iashimbynta ban pynsaphriang ia ka khubor ban iada ia ki wahduid bad ki wah.
Ia kane ka ‘Life to Rivers Rally’ la pynlong da ka Rotary Club Orchid City Shillong bad Rotary Club Shillong Heritage ryngkat ka jingiatreilang bad ka Yes Earth Corps (Shillong), 2 MEGH BN NCC, Shillong bad kiwei kiwei.
Kane ka rally kala sdang na Laitumkhrah Police Point bad la pynkut pat ha NCC Headquarter, Rhino, u Secretary ka tnad Water Resources ka sorkar jylla u SC Sadhu kum u kongsan ula kaweh ia ka lama kum ka jingsdang ia kane ka jingiaid rally ha kaba la iadonlang u symbud kongsan u Col. Chetan Dhiman, NCC, Shillong, ki dkhot ka NCC, Rotary Club of Orchid City, Shillong, Rotary Clubs bad ki nongmihkhmat na ka Shillong Municipal Board bad kiwei kiwei ki tnad jong ka sorkar jylla.
U SC Sandhu, haba ai jingkren kum u kongsan ula ong, ba ka long kaba donkam ban iatreilang ban iada ia ki wahduid bad ki wah kia kordor bad ula kyntu ia baroh ban ym bret ne pyntuid ia ki niut sha ki wah.
Katba u Col. Chetan Dhiman ula banjur iaka kamram kaba khraw kaba ki samla ki don ban leh na ka bynta ban iada bad ban pynneh pynsah ia ki wahduid bad ki wah.
Katba u Rtn Vivek Kumar ula pyntip ba ka “Life to Rivers” kadei ka sienjam jong ka Rotary District 3240, kaba thmu ban pyniadonbynta ia ki Rotary Clubs bad kiwei kiwei ban shim ia ki sienjam ban pynneh pynsah ia ki wahduid bad ki wah kiba don ha ka thain shatei lam mihngi.
Ula ong ban pynlong ia ki wahduid bad ki wah kiba khuid ba suba kadei ka jingkitkhlieh jong baroh lang bad donkam ban iatreilang halor kane ka bynta ban pynneh pynsah ia ki wah bad ki wahduid.
