Shillong, K’Lyngkot 25: Ka United Democratic Party (UDP) Mawlai Circle hynne ka sngi Balang, kala iaid rally elekshon ha Mawlai ban pynthikna ba u Kyrtong Bah Process T Sawkmie, un shah jied biang kum u Nongmihkhmat ka Mawlai sha ka Iingdorbar Thaw Ain ka Jylla.
Ia kane ka rally la pynsdang na ka Iingsah u Bah Process na Mawlai Nongpdeng bad la wan iashimbynta da ki hajar ngut ki paid nongkyrshan naduh ki samla, ki longkmie bad ki Longkpa, kiba la wan na kylleng ki Shnong jong ka Mawlai Constituency.
Ki Nongiaid rally kiba la rah bad ki lama jong ka UDP, kila iaid kylleng ki shnong ka Mawlai ryngkat ki sur jingtem ialap elekshon u Bah Process kiba shongshit bad kiba khring ia ka jingmut jingpyrkhat u paidbah.
U President ka UDP Bah Metbah Lyngdoh ula wan ban pynshongshit lang ia kane ka rally, ban iadonlang ha syndah jong u Bah Process. U Bah Metbah ula wan iasohlang naduh ha Mawlai Petrol Pump ter ter haduh ha Mawlai Standbus, shuwa ban leit pynkut ia ka rally ha madan Mawroh.
Haba ai jingkren hadien ba la pynkut iaka jingiaid u bah PT Sawkmie u la ai khublei ia ki paidbah nongkyrshan kiba la ia iaid lang bad u ban pyni ia ka jingkyrshan jong ki ia u.
U bah P.T Sawkmie ula ong ruh ba kane ka dang dei tang ka jingsdang bad kan sa don biang sa kawei kaba kin iaid pynkut ha ki sngi kiban wan.
