Nongpoh, Jylliew 10: Ki Khun Khristan ka Ri-Bhoi District kila iamih paidbah hynne ka sngi Saitjain ha Nongpoh ban iashimbynta ha ka jingiaid paidbah kum ka dak ban kyrpad ia ki Nongshongshnong ka Jylla Manipur ba kin wanrah noh ia ka jingsuk bad ka jingshongshngain ha kane ka Jylla kaba don hapdeng ka thma iapher Jaidbynriew mynta la palat shibnai.
Kane ka jingiaid paidbah ka dei kaba la pynlong da ka Conference of Religious India, Ri-Bhoi Zone, kaba la pynlong ruh ia ka jingialang ba lyngkot ha khyrdop ka Nongpoh Town Shopping Complex shuwa ban ia iaid paidbah.
Ka thma iapher Jaidbynriew ha Manipur kala sdang naduh ka 3 tarik Jymmang hadien ka rally jong ka All Tribal Students Union of Manipur (ATSUM), kaba pyrshah ia ka jingdawa ki jaidbynriew Meitei ban ai jingithuh kum ki Schedule Tribe ka Jylla.
Ka thma kala khie hapdeng ki Meitei kiba dei ki Hindu bad ki Kuki kiba bun ki dei ki Khristan. Ha kane ka jingiakynad, bun ngut ki paid Khristan kila shah thombor bad bun ruh ki Iing mane Khristan kila shah thang nalor ki skul bad kiwei kiwei.
Ka Conference of Religious India, Ri-Bhoi Zone kala pynlong ia kane ka jingiaid paidbah ha surok bah ka thain Nongpoh ban pyni ia ka dak ka jingiatylli bad jingiadon ryngkat bad ki paid riewlum Khristan jong ka Jylla Manipur lem bad kiwei kiwei ki jaka hapoh ka Ri India.
Ki nongïalam ñiam na ka thaiñ Shatei Lam Mihngi ba kynthup ïa u Br. Varghese SG, Sr. Escociana Vaz MSMHC, NE Regional CRI Secretary, Sr. Prema Chowallur SCC, Convener of North East FORUM of Religious for Justice and Peace, Sr. Teresa Kamasuam FMA, CRI Shillong President Fr. Laurence Kharluni, Shillong Archdiocese, Br. Sunil Britto CFC, CRI Ri-bhoi President, Sr. Melita Syiem MSMHC ki samla jong ka St. Stephen Hostel Girls, Bah Opel Lyngdoh Rangbah Shnong ka Nongpoh bad kiwei kiwei kila wan ban iashimbynta lang.
Ha kane ka jingïaid paidbah ban wanrah ïaka jingsuk ha Manipur, ki nongïashimbynta kila rah ruh ia ki placard ba pynrem jur ïaka jingshah ban beiñ jong ki khristan ha katei ka jylla bad ban dawa naka sorkar jylla jong ka Manipur bad kumjuh ruh ka sorkar pdeng ban ai ka jingïada ïaki paid khristan ha katei ka jylla khamtam ban pynkut noh ïaka jingïakynad khnang ba ki paidbah kin ioh biang ïaka jingsuk.
Ki nongïalam jong ka CRI haba kren ha katei ka sngi kila pynpaw ka jingsngewkhia bad pynrem jur ïaka jingshah lehbeiñ jong ki paid khristan kiba la noh synñiang shibun sha ka imlang ka sahlang ha katei ka jaka naduh ki jaka pule, ki ïiing mane ha kaba kiwei ki riew ngeit ki kheiñ beit ba ki khristan ki dei ki nongpynkylla ñiam, kaba la pynlong ïaki ban thombor bad thang dusmon wat ïaki jaka mane Blei bad ki skul Mission ha kaba bun naki paidbah kila duh noh ïaka jingim ha katei ka jingïakynad.
