Shillong, Jylliew 10: Ka Shillong Lajong kala pynrem da 3-0 iaka Rangdajied United haka jingiakhun ia ka Semi Phainal kaba nyngkong jong ka Meghalaya State League 2023 kaba la long hynne ka sngi ha Kiang Nangbah Stadium, Jowai.
Ha ka jingiakhun haka semi phainal kaba la long ha Tura ka Mawlai kala pynliem iaka Khliehmawlieh da 1-0.
Kine ki kynhun kin iakhun sa shisien iaka Semi Phainal ha ka 13 tarik u Jylliew bad ki kynhun kiba rem ha ka jingialehkai hynne ka sngi ki dang ioh ia ka lad ban ialehkai bha ha ka jingiakhun ka baar jong ka Semi Phainal.
Ha ka jingiakhun ha Jowai, ka Lajong kala ioh thep ia ka kol lyngba u Henry Ford Nongneng ha ka minit kaba 17, u Hardy Cliff Nongbri ula thep ha ka minit kaba 55 bad u rangialehkai ka Rangdajied la kum bakla thep sha la ka jong ka kol haka minit kaba 82.
Ka Rangdajied kala hap ban ialehkai sa tang 10 ngut ki rangialehkai haka minit kaba 78 haba u Aibiangmame Nengnong ula ioh ar tylli ki Yellow Card bad la phah mih noh ia u na ka madan ialehkai bad kane ka jingiakhun ka long kaba shongshit da ka jingwan sakhi jong u paidbah na kylleng ki jaka.
Ka Rangdajied kan hap ban ialehkai bha haka wat ka baar kaban long ha Mawkyrwat, lada ka kwah ban rung sha ka phainal jong ka MSL.
Haba phai sha ka jingiakhun ha Tura, ha PA Sangma Stadium ka Mawlai kala pynrem da 1-0 iaka Khliehmawlieh ha kaba ia kane ka jingiakhun la wan ban sakhi da ki paidbah kynthup ia ka MP ka Tura ka Agatha Sangma kum ka Kongsan.
Ka jingiakhun ka la long kaba iakhaid bha ha ka kylla step hynrei dei haka minit kaba 50 ba ka Mawlai lyngba u Wanboklang Lyngkhoi ula ioh ban thep ia ka kol.
Ka Khliehmawlieh kala lialehkai bha bad kan ialeh ban ialehkai bha shuh shuh haka jingiakhun ha ka wat baar kaban long ha nongbah Shillong haka sngi Baar.
