Shillong, Nailar 20 : U Symbud Myntri Rangbah ba khmih ia ki kam Pohiing (Police) Bah Prestone Tynsong ha ka sngi Palei ula ong ba ka jinglong jingman ka suk ka sain ha Shillong ka dei kaba la lah ban tehlakam bad kam donkam ban pynjari ia ka korphiw miet hadien ki kam thombor ba jia ha ka sngi Balang.
U Bah Prestone ula pyntip ruh ba ka jingpynthut ia ka leit ka wan ha surok Shillong-Guwahati ruh lah dep ban iapynbeit.
Hadien ba pyniaid ia ka jingialang bishar kam bad u Chief Secretary, DGP, DC bad SP ka East Khasi Hills, u Bah Prestone ula iathuh ba ym shym la don shuh kano kano ka jingjia tad haduh ka janmiet sngi Palei.
“Ki bor district kila ai ka jingbatai ba bniah ha ngi. Haduh hynne ka janmiet, kiei kiei baroh kila iaid beit. Ngi la bthah ia ki district ba kin treikam bha ha ka por mynmiet ban pynthikna ha kaban tehlakam ia ka suk ka sain. Ia mynta ngim donkam ban pynjari ia ka korphiw miet” ula ong.
Halor ka jingpakhang surok ha Jorabat bad Khanapara kaba jia naduh hynne ka step, u Bah Prestone ula iathuh ba baroh artylli ki Jylla kila tuklar ia kane ka kam.
“Ngi la bthah ia ki bor district ka Ri-Bhoi, bad u Chief Secretary jong ngi lem bad ka DGP ruh kila iakren bad ki briew na Assam. Ia kane ka jingeh la lah ban pynbeit hynne hi ka janmiet. Katba ngi dang iakren hangne, ka iaid ka ieng ki kali kala long biang kumba ju long” ula ong.
Haba pyntip ba ka KSU kala kyntait ia ka jingkhot iakren ka Sorkar hashuwa ka rally, u Bah Prestone ula iathuh ba ka Sorkar kila khot ia ki lyngba u Deputy Commissioner.
“U Myntri Rangbah ula phah ktien lyngba u Deputy Commissioner ba khot ia ka KSU ban iakren, hynrei kila kyntait da kaba ong ba kila dep buh ia ka prokram. Ngi dang mut ba ka rally kan long kaba jai jai kumba kila ai ka jingkular ha ki bor district” ula ong.
U Bah Prestone ula ong ba ka jingkhang jong ka Sorkar ka long beit kaba plie na ka bynta ki jingiakren hynrei ka jingphaikhmat mynta ka long ban wanrah pat ia ka jingsuk bad ka jinglong ba jai jai, haba bynrap ba ka Sorkar ka skhem jingmut bad ka MMPO Act kala treikam mynta.
Haba kyntait ia ka jingpulom ki jinglum khubor syntiat, ula ong ba ia ka jingbit la ai ha ryngkat ka kyndon bad ka KSU kala ai ka jingkular ia ka rally kaba jai jai.
“Haba phi peit ia ka rally, kiba bun ki khynnah kila phong mask. Kane ka pyni shai ia ka jingthmu jong ki ba kam long kaba jai jai. Ka ain kan shim la ka jong ka lynti” ula ong.
U Bah Prestone ula pyntip ba ka Sorkar kala pyndonkam ia ki drone bad ki video CCTV ban lah ithuh ia ki briew kiba leh ia ki kam thombor.
“Mynta ka sorkar, ki bor district kila trei ia ka kam. Ai ba ngan kular ia phi ba hynnin ka sngi ngi la buh ia ki drone bad kumjuh ruh ki CCTV bad ki bor district ki dang leh ia ka kam ban ithuh ia ki riew bymman kiba leh ia kine ki kam thombor. Ka ain kan shim la ka jong ka lynti” ula ong.
Ula pyntip ruh ba ki Myntri Rangbah jong baroh artylli ki Jylla kila iakren ban wanrah pat ia ka jinglong jingman ba jai jai.
 Bah Prestone Tynsong ha ka sngi Palei ula ong ba ka jinglong jingman ka suk ka sain ha Shillong ka dei kaba la lah ban tehlakam bad kam donkam ban pynjari ia ka korphiw miet hadien ki kam thombor ba jia ha ka sngi Balang.){kind=link}