Shillong, Nailar 20 : U Deputy Commissioner ka East Khasi Hills Abhilash Baranwal ha ka sngi Palei ula ong ba ka bor district kala kyntait ban ai jingbit ia ka KSU ba kan pynlong ia ka rally bad ka jingshong kyllain mungor la sngi Thohdieng namar ki kam thombor ba jia ha ka sngi Balang, haba pynpaw ba ka Sor ka donkam ia ka jinglong ba jaijai ban ka por ban koit.
“Namar ki jingjia ba hynnin ka sngi bad hadien ka jingiakren ba sani bha, ngi larai ban kyntait ha kaban ai jingbit ia ka KSU ba kan pynlong ia ka jingiaid paidbah bad shong kyllain mungor lashai ka sngi” ong u Baranwal.
Ula ong ba ka Sor ka dang ialeh ban ioh pat ia ka jingkoit na ki jingmynsaw ba ka mad. “Na ki bor pyniaid, ngi sngewthuh ba ia mynta ka sor ka donkam ia ka jingkoit bad ka dang ialeh ban ioh pat ia ka jingkoit na ki jingmynsaw ba ka mad hynnin ka sngi. Kaei kaba ka sor ka donkam ka long ka jinglong ba jai jai bad ka por ban ioh ia ka jingkoit ba pura” ula ong.
Haba kyntu ia ki nongialam ka KSU bad ki dkhot ba kin burom ia ka hukum, u DC ula ong ba kane ka sienjam kam dei kaba la shim ban khanglad ia ka hok kat kum ka riti synshar.
“Nga kwah ban kyrpad ia ki nongialam bad ki dkhot jong ka KSU, sngewbha ban burom ia ka hukum ka bor district. Kane ka hukum kam dei ka jingkhang ia ka hok riti synshar. Ia ka hukum la pynmih tang ban ailad ia ki nongshongshnong ka Shillong ba kin ring mynsiem, ba kin ioh pat ia ka jingkoit” ong u Baranwal.
Halor ka jingialang bishar kam bala pynlong ha ka sngi Palei, u Baranral ula iathuh ba ia kane ka jing ialang la pynlong da u Symbud Myntri Rangbah Bah Prestone Tynsong ban khmih bniah ia ka jinglong jingman ka suk ka sain.
Ha kane ka jingialang la iashimbynta da u Chief Secretary, DGP, SP bad ki Ophisar ba dei khmih ia ka suk ka sain.
