Shillong, Nailar 21 : Ki Pulit kila pynkynriah ia ki lai ngut ki nongialam ka KSU ba shah kem na Shillong sha ki phatok bapher bapher ha ri-lum Garo ha ka step sngi Thohdieng, hapdeng ka jingpahara kaba khlain.
Kat kum ka khubor, ia u President ka KSU samla Raymond Kharjana yn pynkynriah sha Williamnagar District Jail katba ia u Vice President samla Pynkmenlang Sanmiet bad u General Secretary samla Reuben Najiar yn pynkynriah sha Tura District Jail.
Ia kine ki laingut ki nongialam ka KSU la rah tian bishar hakhmat ka Iingkashari District & Session Judge ha ka sngi Palei ha Shillong, hadien ka jingshah kem ba iadei bad ki kam thombor kiba mih ha ka rally thuk thuk ka KSU. Ka Iingkashari kala hukum ban set 14 sngi ia ki hapoh ka judicial custody.
Kine ki nongialam ka KSU kila shah kem ha ka sngi Balang hadien ka jingpynkulmar bad jingthombor ha ka rally thuk thuk, kaba lam sha ka jingjulor haduh 31 tylli ki kali, pynmynsaw haduh 16 ngut ki briew, thang ia artylli ki kali nalor ka jingpyn pra ia u mot u Subhas Chandra Bose bad Swami Vivekananda.
Ki Pulit kila pyntip ba kila ioh pdiang haduh 15 tylli ki ejahar halor kine ki jingjia thombor bad kila pynngat ia kine ki nong ialam KSU ha ki kyndon bapher bapher jong ka Bharatiya Nyaya Sanhita 2023.
