Shillong Naitung 06: U Nongialam ka Liang Pyrshah ka ïing dorbar thawaiñ ka jylla bah Ronnie V Lyngdoh, uba long ruh u Nongialam ka seng Congress, ula ong ba ki paidbah ka Thaiñ Shatei Lammihngi ki dei ban husiar bha naka seng BJP, namar tang ba kan don haka bor bad ban jop ia ka elekshon, kane ka party ka la pyrshang ban wanrah ia ka jingiapher niam bad jingiapher jaitbynriew.
“Ngi ki jylla ha thaiñ shatei lammihngi, ngi dei ban husiar namar ba haba peit mynta ha Manipur kam don ei ei ka jingmyntoi ia ki nongshong shnong hynrei tang ka jingduh suda, ka jingiap, ka jingsngewsih bad ka jingiam briew hynrei imat ka sorkar NDA kaba ialam da ka BJP ban ioh shong ha ka bor kam salia ba wat para nongshong shnong ngin iapyniap, iathang ia ki ïingmane, pynjulor ia ki ïing ki sem bad ki paidbah kidei ban husiar na kum kine ki seng saiñ pyrthei”, ong u Bah Ronnie Lyngdoh.
Ula kynnoh ruh ba ka jingleh jong ka seng BJP kadei tang ka buit politik.
U Bah Ronnie ula ong, ba ka jingjia ha ka jylla Manipur kala sakhi ia kane ha kaba ka jingiakynad ka la iaid haduh lai bnai mynta bad kala wanrah ia ka jingduh bun ki mynsiem briew bad ki jingjulor hynrei u Myntri Rangbahduh ka ri Narendra Modi ym shim la don por ban leit sha Manipur tang shi sngi ruh.
“La lai bnai tam ki nongshong shnong ka Manipur kila iakynduh ia ki jingeh bapher bapher na ka jingiakhih bad jingiakynad hynrei u Myntri Rangbahduh ka ri um don por ban leit sha Manipur tang shi sngi ar sngi ban kyrpad ia ki paidbah ban pynneh ia ka shongsuk shongsain ha katei ka jylla,” ong u Nongialam ka Liang Pyrshah.
