Kyntu ia ka Sorkar ban pynshitom kloi ia kiba donkti
Shillong, Nailur 09: U Para trai jong u Nongialam barim ka HNLC ba shah siat iap Bah Cheristerfield Thangkhiew, u Bah Grenary Starfield Thangkhiew ula pynpaw ba u hun ia ka kaiphod jingtohkit jong ka Inquiry Commission hynrei ula kyntu ia ka Sorkar ban leh eiei mardor pyrshah ia ki briew kiba don bynta ha ka jingiap u Hynmen.
U Bah Grenary ula pynpaw ba u khlem pat ioh satia ia ka jingtip ba pura jong ka kaiphod hynrei ula tip ia ki katto katne ki mat jong ka kaiphod lyngba ki Social Media.
“Ka (kaiphod) la kren shai ba ka don ka jingpyniap bad ka jingpyndonkam kput ia ka bor da ki Pulit, ka jingthmu hi ka long ban thom da ka bor pyrshah ia u Hynmen jong nga” ong u Bah Grenary.
“…baroh ngi tip ba ki don ki briew ha lyndet kane ka jingpyniap, da kaba shim kabu ia ka miet, kila siat ia u hynmen jong nga” ula bynrap.
“Kum u dkhot ka Iing, ngi kyntu ia ka Sorkar ban leh eiei mardor da kaba register ia ka case pyrshah ia ka Tactical Team-1 Bad ban aiti ia kane ka kam sha ka CBI” ong u Bah Grenary.
Haba kylli, u Bah Grenary ula ong ba kam don jingktah satia ia u ne ka Iing ka sem lada ki buhrieh ia ka kyrteng na ka kaiphod kaba la wanrah ha ka rynsan u paidbah, namar kila dep tip lypa mano ba donkti ban pyniap.
“Hooid ngi hun ia ka kaiphod hynrei ka shong ha ka Sorkar ban leh eiei pyrshah ia ki briew ba donkti…register case pyrshah ia ki bad aiti ia ka kam sha ka CBI” ula ong.
