Shillong, Jylliew 24: U Myntri ka Tnad Housing u Marcuise N Marak hynne ka Sngi Nyngkong, ula hukum ban pynlong ia ka Departmental Enquiry, ka ban tohkit bniah ban lap ia ka jingshisha halor ka jingkynnoh ba ka don ka jingleh thok ha ka jingthied ia ki tin sopiing.
“Katkum ka kaiphod kaba nga la ioh, kam shym la don satia kano kano ka jinglehbakla hynrei wat la katta ruh, nga la ioh pdiang ia ka jingujor bad nga la hukum ban pynlong ia ka Departmental Enquiry,” ong u Marak haba iakren bad ki nongthoh khubor.
“Hadien ba la pyndep ia ka jingtohkit, lada ngi lap ia kano kano ka jingleh bakla, ngin shim ia ki sienjam (blacklist ia ka kompani) bad ngan pynthikna ba lada don ki ophisar kiba donkti ngin leh da kaba tyngeh kumjuh ia ki ophisar ruh” ula ong.
Ha ka 20 tarik u Jylliew ka Hynniewtrep Youth Council (HYC) kala dawa ban thung da ka kynhun tohkit ha kaba iadei bad ka jingthied bad ka jingsam ia ki tin sopiing ki bym bha kaba long pyrshah ia kaei kaba la buh da tnad Housing.
Nalor kane ka HYC kala dawa ruh ba pynphai noh ia baroh kitei ki tin sopiing kiba la wanrah da ka kompani na West Bengal ha ki C&RD Block jong ka jylla bad ban pynsangeh mardor ia ka jingsam ia kitei ki tin sopiing.
Ka HYC kala kam ba kala pynlong ia ka jingtohkit bad kala shem ba ka Directorate of Housing, Meghalaya kala shim da ki tin sopiing kiba tad bad ki bym bha na ka ‘Hariana Iron Works Pvt. Ltd, Kolkata, West Bengal’, ia kaba kam ju trei ne pynmih ia ki tin sopiing katkum ka rukom treikam jong katei ka kompani.
U Marcuise Marak ula ong, “Ki (HYC) kila kynnoh ia ka Directorate, kumta nga lah bthah ia u Joint Secretary ban pynlong ia ka jingtohkit da ka ‘Technical Team’. Kan shim por kumba 30-35 sngi namar ba ka hap ban leit ha kylleng ki jaka kiba don ki kudam haka jylla, kumta shisien ba la ioh pdiang ia ka kaiphod jingtohkit ngin sa pyntip biang sha phi”.
U Myntri ula kam ba ula dep pynthikna na ka tnad bad shem ba kam shym la don kano kano ka jingleh bakla ha ka jingshim ia ki tin sopiing bad kitei ki tin sopiing kidei kiba la thied kat kum ka jingbuh kyndon bad katkum ka jingdonkam kumba la ia mynjur bad ka kompani.
Ula pynshai ba ka tnad kala sam da ki Aluminium Corrugated Sheets (ACS) ha ka jaka jong ka Corrugated Galvanised Iron (CGI) Sheet.
“Ki tin CGI ki khia hynrei ki tin ACS ki sting bad ki dei kiba bha bad kidei ruh kiba neh slem namar ki tin CGI ki kloi ban sarang. Kumta ka tnad kala rai ban shim da ki ACS da kaba khot Tender, ia kaba la leh ha u snem 2022 da ka sorkar kaba la dep”ong u Marak bad ka bynrap, “Ka kompani kala ioh iaka tender kaba 24 bnai, kaba la kut noh mynta u snem ha u bnai Lber. Kumta ngim shym la don ia kano kano ka lad ban ai iaki bad ki mar kiba kila pynpoi ruh ki long kiba bha katkum ka jingbuh kyndon”.
“Watla katta ruh namar ba ka sengbhalang kala buh ia ka jingujor bad kila leitsha ka kudam jong ka tnad Housing, Nga lah bthah ban pynlong iaka jingtohkit. Ngin pynlong da ka jingtohkit kaba thikna mynta bad tang hadien ba la dep ka jingtohkit ngan sa lah ban ai iaka jubab, la ngi la shim da kitei ki mar, ia kaba ngi lah dep ban pan. Kumta ngan sa pyntip biang hadien ba la pyndep ia ka jingtohkit” ula ong.
