Tura, Jylliew 17 : Ka Iingkashari POCSO, Tura kala hukum ban set along haduh 5 snem ia uwei u tynmen bala 70 snem ka rta namar ka jingpyrshang ban leh beijot ia kawei ka Khynnah hala ka jong ka Iingsah.
Kane ka jingjia kala jia ha ka 18 tarik Jylliew 2021 ha kaba une u tynmen ba kyrteng u Pranesh Chakraborty Roy ba na Dobakol, Tura, ula pyrshang ban leh beijot ia kawei ka Khynnah hala iing.
Ki Pulit kila register case halor ka ejahar bad iaka jingtohkit la aiti ha ka Sub Inspector ka Women Branch Esther Ch. Marak, kaba la chargesheet hadien bala dep lum ia baroh ki sakhi satar.
Ia u Pranesh la shah ba u donkti ha kane ka kam bymman bad pynngat ha ka jingpynsajia kat kum ka kyndon 9 (m)/10 POCSO Act. Ka Iingkashari kala ai hukum ban set along 5 snem lem bad ka kun aba T. 10,000 ia une u tynmen kat kum kane ka kyndon 9 (m)/10 POCSO Act.
La ong ba lada une u nongleh bymmen um lah ban siew ia ka kuna, un hap ban shong along sa 3 bnai.
Nalor kane, halorka kyndon 11(i)/12 POCSO Act, ka Iingkashari kala hukum ruh ban set along sa 1 snem ia une u tynmen nalor ka kun aba T. 2000. Lada um lah siew ia ka kuna un hap shong along tam sa 1 bnai.
