Hukum set phatok 20 snem ia u Doktor ba jrong kti ia ka Khynnah ha Mairang

0
52
Representative Photo

Shillong, Iaiong 03 : Ka Iingkashari Special Judge (POCSO) ka Eastern West Khasi Hills, kala hukum ban set along haduh 20 snem ia uwei u doktor uba jrong kti bad leh khlem akor ia kawei ka Khynnah ha ka thain Mairang.

Une u Doktor u kyrteng u Ayam Sunil Khuman ba 58 snem ka rta, uba sah ha Pyndengumiong bad ba dei shnong train a Khurai, Imphal East District.

Kat kum ka jingithuh u Superintendent of Police ka District, une u doktor u don ia ka Clinic ha ka shnong Pyndengumiong, Mairang. Ia kane ka kam bymman une u doktor la pyntip sha ki Pulit lyngba ka ejahar bala mudui ha ka 27 tarik Naitung 2020.

Ki Pulit kila register case pyrshah ia une u Doktor hapoh ka Mairang Police Station halor ka kyndon 7/8 POCSO Act bad la tohkit ia ka da ka WPSI RR Marak jong ka Mairang Police Station.

Ka Iingkashari u Special Judge M Kumar ha ka jingbishar, kala rai pynrem ia une u doktor bad hukum ban set phatok haduh 20 snem ha ryngkat ka kun aba T.1,25,000 hapoh ka kyndon 6 jong ka POCSO Act bad 5 snem ha phatok ryngkat ka kun aba T.25,000 hapoh ka kyndon 10 jong ka POCSO Act.

Ka Iingkashari kala buh kyndon ruh ba lada une u doktor um lah ban siew ia kine ki kuna, un hap ban shong phatol sa 6 bnai.