Hukum ka Tnad Education ia ka IIPH, Shillong ban sangeh pyniaid ia ka MPH course

Date:

Share post:

Shillong, Naitung 13: Ka Tnad Education ka Jylla kala hukum ia ka Indian Institute of Public Health, Shillong (IIPHS) ba kan sangeh noh mardor ia ka jingpynrung klas ha ka Post Graduate Programme jong ka Master of Public Health (MPH) bala pyniaid ryngkat ka jingiatreilang bad ka Martin Luther Christian University (MLCU).

Ka Tnad kala shimkhia ruh halor ka jingkynnoh pyniasoh jong ka IIPHS bad ka MLCU haba maham ba ka Degree bala dep ai, ka lah ban nym ioh ia ka jingpynthikna naka Sorkar Jylla bad ka Meghalaya Private University Regulatory Board (MPURB).

Ha ka shithi bala phah sha ka IIPHS ha ka 7 tarik Naitung, u Deputy Secretary ba khmih ia ka Tnad Education Bah D Lyngdoh ula ong “La bthah ia nga..ban kyrpad ba ym dei shuh ban pynrung klas ha ka Instititute tad haduh da pynmih da kawei pat ka hukum”.

U Deputy Secretary ula phah ruh ia ka shithi sha baroh ki University shimet ba bthah ia ki ba kim dei ban ai pyniasoh bad kino kino ki Institution/ College lem kumta ki Degree ba ki ai, kin nym ioh ia ka jingpynthikna da ka Sorkar Jylla bad ka MPURB.

Ka Tnad Education kala kyrpad ruh ia ka Tnad Directorate of Information & Public Relation (DIPR) ban pynmih ia ka Public Notice ha ki kot khubopr ba ki University Shimet hapoh ka Ain jong ka Jylla, kim don bor satia ban ai pyniasoh ia kino kino ki College/ approved college/autonomous college.

Nalor kane, ka Tnad kala pan ruh ia ki thup jingthep halor ka “Interim arrangement” ne jingiapynbeit ba shipor hapdeng ka IIPHS bad ka MLCU ban ioh shong bishar da ka Meghalaya Private University Regulatory Board (MPURB).

“La bthah ia nga ban kyrpad ia phi ba phin ai lut ia ki jingtip, ki kot ki sla ba iadei bad ka jingiatreikam hapdeng ka Martin Luther Christian University (MLCU), ka Indian Institute of Public Health, Shillong (IIPHS) bad ka Sorkar Jylla ha ka Tnad ka koit ka khiah ba kan ioh shong bishar da ka MPURB” ong u Deputy Secretary lyngba ka shithi bala phah sha u Under Secretary ka Tnad ka Koit ka Khiah bala phah ha ka 7 tarik Naitung.

Ia kane ka kam la pynmih nyngkong eh da Ka Shlem news portal, kaba iadei halor ka jingkynnoh pyniaid beain ka IIPHS ia ka Post Graduate Programme halor ka Master of Public Health (MPH) ha ka jingiatreilang bad ka MLCU.

Hynrei ia kane ka khubor la kyntait da u Principal Secretary ka Tnad ka Koit ka Khiah u Sampath Kumar lyngba ka shithi jingpynshai bala phah ha ka 4 tarik Jylliew, kaba kam ba ka MPH Degree kam dei kaba ai da ka IIPHS hynrei da ka MLCU.

Une u Ophisar IAS ula kam ruh ba ia ki samla pule la hikai da ki nonghikai na ka MLCU bad ka IIPHS haba kam ruh ba ia kane ka jingiapynbeit hapdeng ka MLCU bad ka IIPHS ka dei kaba la ai jingbit da ka UGC, ka MLCU Act 2005 kumba la kdew ha ka chapyer II clause 7(c) bad clause 8(19) bad ka resolution jong ka IIPHS Society.

Haba pynpaw ba ka jingiatreilang ka IIPHS bad ka MLCU ka dei tang ka jingiapynbeit ba shipor, u Principal Secretary ula ong “Ka long kaba donkam ban ioh ia ka jingithuh kum ka University ban ai ia ka degree, dei ta ka daw bala mih kane ka jingiapynbeit ba shipor hapdeng ka IIPHS bad ka MCLU kaba long ruh kumjuh kum ka NEIGRIHMS, kaba la iasoh bad ka NEHU ban ai ia ki Medical Degree”.

Kat kum ka Website jong ka IIPHS, kane ka Institute kala tyrwa ia ka Post Graduate Programme ha ryngkat bad ka MLCU bad la phiah ia kane ka course haduh saw semester na ka bynta arsnem, kaba la sdang naduh u bnai Nailar 2020 haduh u Naitung 2022. La ong ruh ba ia ki application form lah ban shim na ka website jong ka MLCU.

Ka Khubor ka iathuh ba ka IIPHS kala pynkhreh ia ka Bill ban pynlong ain da ka IIngdorbar Thaw Ain ka Jylla ba kan ioh noh ia ka jingithuh kum ka IIPH University hynrei ia kane ka Bill la pynphai sha ka Tnad ka Koit ka Khiah ha ryngkat ki jingkylli. Kane kala jia ha u snem bala lah bad haduh mynta, ka Tnad ka Koit ka Khiah kam pat jubab satia ia kine ki jingkylli bala buh da ka Tnad Pule Puthi.

Lah ban kdew hangne b aka Sorkar Jylla kala dep ai ia ka jaka ba heh haduh 22.3 acre ia ka IIPHS ba kan pynieng ia ka campus jong ka hynrei namar ka jingiehshrah ia kane ka jaka, ka Sorkar ha u snem 2017 kala knieh noh ia ka jinglong trai.

Share post:

spot_img

Popular

More like this
Related

Jur ka jinghap thah ha Sikkim, sahkut palat 500 ngut ki nongshang suwari

Gangtok, Rymphang 21: Namar ka jingjur ka jinghap thah,...

Dawa ki nongrep ia u DC ban kem naphang ia kiba thang lum ha WKH

Nongstoin, Rymphang 21 :Ka seng ki nongrep Hills Farmers...

Kurup ki BSF ia ki dawai Phensedyl bad ka shini ba khappud Bangladesh

Shillong, Rymphang 21: Ki shipai BSF ha ka sngi...

Plie u Dr Mansukh ia ka workshop ka koit ka khiah ki Jylla NE ha Shillong

Shillong, Rymphang 21: U Myntri ka Sorkar Pdeng ba...