Shillong, Rymphang 13 : Ka Iingkashari Supreme Court ha ka sngi Palei, kala hukum ban pynduh pyndam noh ia ka CMJ University ha Meghalaya, haba pynksan ia ka rai jong ka Sorkar Jylla ban khangdam ia kane ka jaka ha u snem 2014 namar ka jingshukor ia ki hajar ngut ki samla pule da kaba ai degree certificate thok.
Ka Iingkashari ba hakhliehduh ka Ri kala pynksan ia ka hukum ka Jylla, haba kyntait ia ka hukum ka Iingkashari MeghalayaHigh Court jong u sne 2021 ba bthah ban pyrkhat biang arsien ia ka jingpynduh pyndam ia kane ka skulbah.
Ia kane ka jingkyrpad la mudui haba tynjuh ia ka hukum ba pynmih ha ka 6 tarik Jymmang 2021 da ka Division Bench ka Iingkashari Meghalaya High Court ha Shillong ha kaba ka hukum ba 16 tarik Naitung, 2015 bala pynmih da u Single Judge ka Iingkashari ha ka Writ Petition (C)No 177 of 2014 la pyniap bad kdat noh sharud bad ia kane ka kam la phah pat sha u Single Judge ba un shim ia ka rai kaba iahap haba iadei bad ka jingtreikam jong ka hukum, ban pynduh pyndam ia ka Chandra Mohan Jha University, hapoh ka hynriew bnai.
Lyngba ka hukum ba 16 tarik Naitung, 2015, u Single Judge ka High Court ula khein iap bad kdat sharud ia ka hukum ba 31 tarik Lber 2014 bala pynmih da ka Sorkar Meghalaya ban pynduh pyndam ia ka University bad khein iap ia ka show cause notice ba 12 tarik Naiwieng 2013 bad 24 tarik Kyllalyngkot, 2014 bala phah sha ka University da ka Sorkar Jylla.
Ha ka hukum, ka Iingkashari ba kynthup ia u Justice PS Narasimha bad Sandeep Mehta ula ong “Kat kum ka rukom pyniaid bala pruid dak ha ka kyndon 14 (1) jong ka Act ban thung ia u Chancellor Chandra Mohan Jha (CMJ) ym shym la bud da ka CMJ University bad hadien kane, ka jingthung ia u Chancellor ka CMJ University kam dei kaba khlem jingmut bad ka bym shong ain naduh kaba sdang”.
