“Wat pyndem ia kano kano ka jingmushlia ki riew sain pyrthei”
Shillong, Risaw 18 : Ka Iingkashari Meghalaya High Court hynne ka sngi ba-ar, kala hukum ia u Chief Secretary bad ia u Director General of Police (DGP) ba kim dei ban pyndem ia kano kano ka jingmushlia ki riew sain pyrthei haba pyntreikam ia ka hukum ban tehlakam pura ia ka jingtih dewiong beain hapoh ka Jylla.
“U Chief Secretary, u Director General of Police bad baroh ki Pulit kin pynthikna ha kaban pyntreikam pyrkhing bha ia ka hukum bad ym dei ban pyndem ia kano kano ka jingmushlia ki riew sain pyrthei ha kane ka kam” ong ka Full Bench haba pynmih hukum halor ka PIL ba shong bishar hynne ka sngi.
Ka Iingkashari kala maham ruh ba u CS bad u DGP kin hap shim ia ka jingbahkhlieh lada dang lap ia ka jingtih tuh ia u dewiong ha ka Jylla haba hukum ia u DGP ban bthah ia baroh ki Superintendent of Police (SP) jong ki District ba kin pynthikna ba ym dei ban shah iaid wat tang shi ounce u dewiong ba tih dewiong, la ka dei da ki trok ne kiwei kiwei ki kali.
“Ki SP ha baroh ki District ka Jylla kin don ha ka notice ba lada lap ia u dewiong ba tih beain ha Jylla ba u mih ne iaid lyngba ki jaka jong ki, kin shah pynhap hapoh ka contempt (jingpynkhein hukum)” kala maham.
Ka Iingkashari ka ong ba nalor ka rukom tih dewiong thliew khnai ba buh jingma tam, khamtam ha ki bynta lam mihngi jong ka Jylla, kala don ka jingiakren ba ia u dewiong ba tih tuh na Jylla la khaii shabar ka Jylla bad une u juh u dewiong u wanphai biang bad pyniaid shalan sha ka Ri ba marjan da ki kot ki sla ba shu shna thok, tang ban pyni ba une u dewiong u dei uba mih na kiwei pat ki Jylla.
Ka Iingkashakri ka ong ba ki don ruh ki khubor ba bun bah u dewiong ba tih beain na Jylla la khaii sha kiwei pat ki Jylla, kaba bun hi da ki trok kiba don ia u nombor plate ka Nagaland bad ki kot ki sla ba pyni ba u dewiong u dei uba la tih na kiwei pat ki Jylla ka thain Shatei Lam Mihngi.
Ka Iingkashari ka ong ba ka Supreme Court kala pynmih ia ka hukum haba pynshong nongrim kat kum ki hukum bala pynmih da ka National Green Tribunal (NGT) ban tehlakam pura ia ka jingtih dewiong beain ha ka Jylla.
Ka Iingkashari kala pyntip ruh ba ka Sorkar kala pynmih jingpynbna ia ka policy ban tih ia u dewiong ha Jylla ha ka 5 tarik Lber 2021 bad kala ioh pdiang ruh ia bun ki application. Hynrei, ym pat shym la ai licence satia ban tih ia u dewiong haduh mynta.
“Hynrei, ka jingtih beain ia u dewiong ka dang bteng wat hapdeng ki hukum barim jong kane ka Iingkashari kaba long haduh u bnai Lber mynta u snem. Ka hukum jong ka NGT bad ka Supreme Court kala treikam naduh u snem 2016 ne hashuwa kane” kala ong.
Ha kajuh ka por, ka Iingkashari kala bthah ia ka Jylla bad ia ki Ophisar ba kin pyndep noh ia ki jingdonkam baroh ha kaban die lilam noh ia u dewiong bala dep tih mynshuwa, hashuwa ban kut u snem 2023.
Kala bthah ruh ia ka Coal India Limited bad ka MSTC Ltc ba kin ai ka jingiarap bad dei ban pyntip mardor sha u Justice Katakey lada don ka jingbym leh eiei na ka liang ka Sorkar Jylla ban pyntreikam ia ki kyndon, ki jingbuh porn a ka bynta ban lilam noh kham kloi ia u dewiong bala dep tih lypa.
Ka Iingkashari kala buh ban shong bishar biang ia kane ka mukotduma ha ka 9 tarik u Naiwieng.
