Shillong, Risaw 18 : Ka Federation of Khasi Jaintia & Garo People (FKJGP) kala dawa ia ka Sorkar Jylla ban wanrah noh ia ka State Employment Policy bad ka jingkhuid ha ka jingthungkam thungjam hapoh ka Jylla.
Kine ki dei ki artylli ki mat jingdawa jong ka FKJGP ki ban sa pynshai paidbah ha ka rally (iaid paidbah) ha Nongbah Shillong, ka ban long ha ka 28 tarik Risaw.
Kane ka rally kan sdang naduh ka por 11 baje mynstep na Motphran bad yn pynkut da ka jingialang paidbah ha Madan Iewrynghep, (Fire Brigade).
Kiwei pat ki mat jingdawa kiba ka FKJGP kan buh hakhmat ka Sorkar ka long ban thungkam noh mardor ban pyndap ia ki kam kiba sah thylli kumba 3000 tylli tam kumba la pyntip da u Myntri Rangbah ka Jylla ha Iingdorbar Thaw Ain dang shen.
Ka FKJGP kan dawa ruh ban hukum ia ka Meghalaya Public Service Commission (MPSC) bad ki District Selection Committee (DSC) ba kin pynsted ha ka thungkam thungjam ha ki tnad bapher bapher jong ka Sorkar.
Halor ka State Employment Policy, ka FKJGP ka kwah ba kane ka policy kan treikam salonsar la ka long ha ki Tnad ka Sorkar Jylla, ki Tnad ka Sorkar Kmie kiba don ha Jylla, ki Private Corporation/ Private Company/ Private Bank da kaba ailad shuwa ia ki samla trai ri trai muluk.
Nalor kine, ka FKJGP kala pynlong ia kane ka rally ban dawa plie lad plie lynti ia ki samla trai ri trai muluk lyngba ki Skill Development Training Programme & Job Oriented Training Programme wat ha ki jaka pule baphr bapher.
Ka FKJGP kan dawa ruh ban pynkylla ia ki Youth Hostel kum ki Youth Recreation Centre/Career Guidance Centre bad ban thaw ia ki Meghalaya State Youth Commission khnang ba ki khun samla kiba kylla langknia kin iohlad ban ujor ban ioh ia ka jingbishar kaba hok ha ki bynta bapher bapher.
Kawei pat ka mat jingdawa ka long halor ka jingthaw lad thaw lynti ia ki samla ba kwah seng kam lajong.
Halor kine ki mat, ka seng ka kyntu ia ki samla pule, ki khun samla, ki kmie ki kpa, ki Dorbar Shnong bad ki seng Treimon Sngewbha (Seng Samla, Seng Longkmie, Sports Club, Association bapher bapher) bad ia baroh ki paidbah nong Shong shnong Jong ka Bri u Hynñiewtrep ban ai ka jingkyrshan kaba pura da kaba ia mih paidbah ha katei ka sngi.
