Dhubri, Risaw 01: Katba ka jingwad bad ki jingpyrshang pyllait im ki dang iai bteng ban lapdien ia uwei u heh sorkar uba la jah rngai noh hadien ka jingkylla lieng hapoh ka wah Brahmaputra ha Dhubri district ka Assam, na ka liang u MP ka thain uba dei u khliehduh jong ka seng AIUDF, u Badruddin Ajmal ula kynnoh ba kane ka jingjia baroh kala wan jia namar ki kam iasylla.
U Badruddin Ajmal ula kynnoh ba kane ka jingjia kylla lieng hapoh ka wah Brahmaputra hapoh Dhubri district ka Assam kala wan jia namar kala don ka jingiasylla ban weng ia u heh sorkar uba shida.
Haba pynmih ia kane ka jingkynnoh, une u hehduh ka AIUDF ula dawa ruh na ka bynta ban pynlong da ka jingtohkit kaba bniah halor kane ka jingjia.
“Kane ka jingjia baroh kala wan jia lyngba ki kam iasylla ban weng ia u ophisar uba shida,” ong une u MP na Assam.Ula ong ruh; “Ngi dawa ban pynlong ia ka jingtohkit halor kane ka jingjia lyngba kane ka phang.” “Ngi duwai bad kyrmen ba une u heh sorkar un ioh lait im bad ban lapdien pat ia u.”
Ha kane ka sngi Palei ba la lah, kawei ka lieng kaba kit ia 29 ngut ki briew kala ngam jyllop noh hapoh ka wah Brahmaputra hapoh Dhubri district ka Assam hajan khappud bad ka Bangladesh.
Ki kynhun aijingiarap na ka tnat SDRF ka Assam bad ki bor shipai border security force (BSF) ki dang iai bteng ban pynlong ka jingwad ia une u heh sorkar uba dang jah rngai haduh mynta.
Watla katta ia ki 28 ngut kiwei pat ki briew kiba shong hapoh katei ka lieng kaba la kylla khongpong la lah ban pyllait im da ka tnat SDRF bad ki BSF.
Ia une u heh sorkar ka Assam uba jah rngai la tip kyrteng kum u Sanju Das uba dei u circle officer hapoh Dhubri district ka Assam.
