Shillong, Jymmang 09: Ki ar ngut ki khynnah Pule kiba la ioh iaka kyrdan First Position haka eksam HSSLC Science bad Commerce, kila pynpaw ia ka jingsngewkmen ba ha ka sien kaba nyngkong eh baka Laban Bengalee Boys Higher Secondary School, kala ioh bat lang ha kajuh ka por iaka kyrdan kaba nyngkong ha Science bad Commerce.
“Ha ki snem kiba la dep, ka skul jong ngi kala ioh bat iaka kyrdan kaba nyngkong ha ka Science bad Commerce bad na ka jingiohi ia ka jingtrei shitom jong ki khynnah pule kiba mynshwa, kala ai mynsiem ia ngi ba ngin leh bha iaka eksamin” ong u Rishab Purkayastha uba ioh iaka First Position ha ka Commerce Stream.
“Nga dap da ka jingkmen ba u Paralok jong nga u Arnab Dutta ula ioh iaka First Position haka Science Stream bad nga pat ialade nga la ioh ia ka First Position ha ka Commerce bad kane kadei ka sien kaba nyngkong eh iaka skul ka jong ngi ba ngin ioh bat iaka kyrdan kaba hakhmat ha ka Science & Commerce Stream” ula bynrap.
Katba u Arnab Dutta uba ioh first position ha ka science ula ong “Ha u snem 2021 bad ha u snem ba la dep, ka skul kala ioh iaka First Position ha ka Science hynrei mynta u snem ka long kaei kaei kaba sngewtynnad ba ka skul jong ngi kala ioh iaka First Position ha ka Science ryngkat bad ha ka Commerce bad nga da sngewkmen shisha halor kane”.
Lah ban kdew ba u Arnab ula ioh iaka First Position ha ka Science Stream da kaba ioh 483 mark bad Distinction ha ki 5 tylli ki subject, katba u Rishab Purkayastha ula ioh iaka First Position ha ka Commerce Stream da kaba ioh 484 mark bad Distinction ha ki 6 tylli ki subject.
