Nongstoin, Nailur 17 : U Additional Deputy Commissioner (ADC) ka West Khasi Hills Bah MA Challam, ha ka sngi Ba-ar, ula hiar sha ka Hima Jyrngam, ban tohkit ia ka jingujor jong ka Khasi Students’ Union (KSU) ba wan kyntur pud ka Sorkar Assam ha ki 4 tylli ki Shnong Khasi, kiba hap hapoh ka District.
Ka KSU-WKH ha ka sngi Nyngkong, kala ujor sha u Deputy Commission ka WKH, ba pyntip ba ka Sorkar Assam ha ka 11 tarik Nailur, kala wan sorjamin jaka ha ki 4 tylli ki Shnong Khasi ban shna ia ka surok. Kine ki shnong ki kynthup ia ka Nongdronpara, Nongma, Nongmawlein bad Nongsohram.
U ADC Bah MA Challam ryngkat ki Heh Pulit, ula hiar hynne ka sngi sha ka shnong Nongma bad lum ia ka jingialang jong ki 4 Shnong ha Dorbar Hall ka Shnong, ban sngap dalade ia kaei kaba ki trai shnong ki ai jingtip halor kane ka jingkynnoh kyntur pud. Kane ka jinghiar ka long ruh shibynta ban pynthikna ia ka shongsuk shongshngain u paidbah.
Ha kane ka jingialang la wan ban iashimbynta da ki Nongialam Shnong na baroh 4 shnong ha ryngkat ki dkhot ka seng Khasi Students Union (KSU).
Haba kren ha ka jingialang, u ADC ula pyntip ba kane ka jingwan sorjamin ka Sorkar Assam bad ki Pulit, ka dei kaba la leh khlem da pyntip sha ki bor District ka West Khasi Hills lane sha ki Sordar Shnong.
Ula kular ba ki bor district kin sa nang wad jingtip shuh shuh halor kane bad ban sa iakren ruh bad u Deputy Commissioner ka Kamrup District ba un leh ia kaba donkam.
U President ka KSU Ri Muliang samla Biangboy Sangriang haba iakren bad ki lad pathai khubor hadien ba wai ka jingia lang, ula kynthoh ba ka jingshlur jong ka Sorkar Assam ban pynbiej da ki song pynroi ha khappud ka West Khasi Hills ka dei namar ka Assam ka iohi ia ka jingbym lah jong ka Sorkar Meghalaya ban theh bad pynpoi ia ki kam pynroi sha ka thain.
Une u Nongialam ka KSU ula kynthoh jur ia ka jingleh kmienah jong ka Sorkar Jylla ia ki jaka khappud la ka dei ha ka liang ka surok, ki jaka sumar, ka pule puthi bad kiwei kiwei.
Ha kajuh ka por, ula maham ia ka Sorkar Assam ba kam dei ban wan pyndik ia ki paidbah namar ba ka jingiakren pynbeit pud hapdeng ki ar jylla ka dang iaid shakhmat. Ula ong ba lada ka Assam ka iai leh donbor, ka KSU ruh kam salia ban iakhun pyrshah ban iada ia ki paidbah da kano kano ka lynti.
